इक्वेडरमा सैनिक विमान दुर्घटना, सबै २२ जनाको मृत्यु

३ चैत इक्वेडर – दक्षिण अमेरिकी मुलुक इक्वेडरमा सैनिक विमान दुर्घटना भएको छ । दुर्घटनामा पसर विमानमा सबार सबै २२ जनाको ज्यान गएको छ ।

विमान इक्वेडरको पूर्वी प्रान्त पास्टासाको अमेजन क्षेत्रमा दुर्घटनामा परेको हो । इक्वेडरका राष्ट्रपति राफाइल कोरेयाले ट्वीट गरेर घटनाको पुष्टी गरेका छन् । । दुर्घटनामा कोही पनि बाच्न सफल नभएको राष्ट्रपति कोरेयाले बताए । उनले ज्यान गुमाएकाका परिवारमा समवेदना व्यक्त गरे ।

ज्यान गुमाउनेमा चालक दलका दुई, एक प्राविधिक तथा १९ जना इक्वेडरियन सैनिक छन् । ती सैनिक प्यारासुटिङको तालिमका लागि गएका थिए । इजरायलमा बनेको आराभा विमान नेपाली समय अनुसार बुधबार बिहान सवा १ बजे दुर्घटना भएको हो । दुर्घटनाको कारण भने थाहा भएको छैन । इक्वेडरका रक्षा मन्त्री रिकार्डो पाटिनोले उद्दार टोली घटनास्थलतर्फ गएको बताए ।
– एजेन्सीको सहयोगमा