होटल मालिकको पिटाइबाट मजदुर गम्भीर

धादिङ
पृथ्वी राजमार्ग अन्तर्गत धादिङको ढाँडेमा बसका यात्रुलाई खाना खुवाउने नमस्ते नेपाल होटेल सञ्चालकले होटेलमा काम गर्ने निर्दोस मजदुरलाई कुटपिट गराएका छन् ।

सोमबार साँझ विरामी परेर आफन्तकोमा बसेका धादिङको थाक्रे गाँउ विकास समिति वडा नम्बर ३ का रामकुमार कार्कीलाई होटेलमा बोलाएर विना कारण होटेल सञ्चालक कृष्ण ढकालले बाहिरबाट मान्छे बोलाएर कुटाएको पिडित कार्कीले बताए । कुटाइबाट मजदुर कार्की घाइते भएका छन् ।

होटेल सञ्चालक ढकालले आफ्नो नातेदार पर्ने कान्तिपुर होटेल सञ्चालक रमेश प्याकुरेललाई कुट्न लगाएको पिडित कार्कीले बताए । प्याकुरेलले कार्कीको आँखा र अनुहारमा अन्दाधुन्द मुक्का हानेको घाइते कार्कीले जानकारी दिए । सख्त घाइते कार्कीको अन्नपुर्ण न्युरो अस्पतालमा उपचार भइरहेको छ । कुटपिटमा संलग्न प्याकुरेललाई आज इलाका प्रहरी कार्यालय खानीखोलाले नियन्त्रणमा लिएको छ ।

पिडकमाथि कानुनवमोजिम कार्वाही माग गर्दै पिडितकी श्रीमती प्रमिला कार्कीले इलाका प्रहरी कार्यालय गजुरीमा जाहेरी दिएको छ । प्याकुरेल पक्राउ परेपनि घटनासंग जोडिएका अन्य दुई जना पक्राउ परेका छैनन् । काम गरेको तीन महिनासम्म तवल नपाएका कार्कीले आफुलाई विना कारण एक्कासी कुटपिट गरेको आरोप लगाएका छन् ।