Pabil News
१५ बैशाख, धादिङ –
बैशाख ३१ गते हुन लागेको स्थानीय तहको निर्वाचनमा बालबालिका प्रयोग नगर्न जिल्ला बालकल्याण समिति धादिङले आग्रह गरेको छ ।
निर्वाचनसँग सम्बन्धित गतिविधिले बालबालिका जोखिम पर्ने भन्दै समितिले यस्तो कार्यमा संलग्न नगराउन आग्रह गरेको हो ।
समितिले निर्वाचनसँग सम्बन्धित प्रचारप्रसार लगायतका कार्यमा बालबालिकालाई प्रयोग नगर्न, विद्यालय क्षेत्रभित्र आमसभा, माइकिङ लगायतका गतिविधिमा संलग्न नगर्न÷नगराउन सबै राजनीतिक दललाई आग्रह गरेको छ ।
त्यस्तै शैक्षिक संस्थाको भित्ता वा पर्खालमा पोस्टर नटाँस्न, भित्ते लेखन नगर्न, विजय जुलुसमा बालबालिकालाई सहभागी नगराउन अपिल गरेको जिल्ला बालकल्याण समिति धादिङका प्रमुख हरि उप्रेतीले बताए ।
अधिकांश राजनैतिक दलले चुनावी गतिविधिमा बालबालिकाको प्रयोग नगर्ने प्रतिबद्धता जनाए पनि केही ठाउँका विद्यालयमा राजनीतिक सभा भएको देखिएकाले यस्तो नगर्न आग्रह गरेका हुन् ।
निर्वाचन आयोगले जारी गरेको निर्वाचन आचारसंहितामा पनि निर्वाचन प्रचार प्रसार, आमसभा तथा जुलुसमा बालबालिकाको प्रयोग गर्न वा गराउन नहुने उल्लेख गरिएको छ ।
निर्वाचन प्रचारप्रसार, आमसभा तथा जुलुसमा बालबालिका प्रयोग गर्न नहुने विषयमा निर्वाचन आचारसंहिता २०७२ (दोस्रो संशोधन, २०७३)ले पनि प्रतिबन्ध लगाएको छ ।
२०७४ बैशाख १५ गते प्रकाशित
About The Author
