झमक घिमिरेको जीवन काँडा कि फूल अडियो बुकमा आउँदै

लन्डन- झमक घिमिरे । अबोला तर नेपाली साहित्यकी अद्भुत प्रतिभा । शारीरिक रूपमा अशक्त भए पनि सशक्त धेरैका लागि प्रेरणास्रोत । बोल्न नसक्ने र खुट्टाले लेख्ने यी लेखिकाको कलमले हर प्रकारका विभेद, कुसंस्कार र अन्धविश्वासको विरोध गर्दै वैचारिक स्वतन्त्रताको शंखघोष गरेको ठान्नेहरू अधिक छन् । भौतिक शरीर पूर्ण नभए पनि उनी महान् स्रष्टाको पंक्तिमा रहिन् । यिनै झमक घिमिरेलाई अब सुन्न सकिनेछ ।

मदन पुरस्कारसहित नेपाली साहित्यमा सर्वाधिक पुरस्कार र सम्मान दिलाउन सफल झमकको आत्मजीवनीपरक निबन्ध संग्रह ुजीवन काँडा कि फूलु सुन्ने किताब (अडियो बुक) का रूपमा आउने तयारी अन्तिम चरणमा छ । नेपालीमा अडियो बुकका जन्मदाता खगेन्द्र नेपालीले आफ्नो छैटौं अडियो बुकका लागि छनोट गरेका हुन् झमकको उक्त कृति ।

आउँदो महिना अडियो बुक सार्वजनिक गर्ने तयारीमा छु, नेपालीले भने, झमकको आत्मबल र जीवनीबाट प्रभावित भएर उनको रचना अरू जनमानसमा समेत थप फैलियोस् भन्ने मनसायले यो प्रोजेक्ट गरें ।

सुन्ने किताब आठ घण्टा लामो हुनेछ । किताब सार्वजनिक भएपछि सम्भव भएसम्म अपांगहरूका लागि काम गर्ने हरेक संघसंस्था, व्यक्ति र दृष्टिविहीनलाई निःशुल्क वितरण गर्ने सोच नेपालीको छ ।

२७ वर्ष लन्डनस्थित बीबीसी नेपाली सेवामा बिताएर अवकाश लिनुअघि दस वर्ष उक्त सेवाको प्रमुख रहेका नेपालीलाई रिटायर्ड लाइफ घरमै बिताउनु थिएन । रेडियोमा बोलेको आफ्नो लामो अनुभव मिल्दोजुल्दो क्षेत्रमै खर्चने सोच आएपछि उनले नेपालमा प्रयोगै नभएको अडियो बुक चलनको न्वारन गरे ।

उनले पहिलो अडियो बुक विश्वेश्वरप्रसाद कोइरालाको आत्मवृत्तान्त ल्याएु सन् २००६ नोभेम्बरमा । त्यही वर्ष अप्रिलमा बीबीसी नेपाली सेवाबाट अवकाश पाएपछि उनले लगत्तै आफ्नो बोल्ने कला अडियो बुकतर्फ सारेका थिए । त्यसपछि नेपालीले डायमनशमशेर राणाको सेतो बाघु, रमेश विकलको अविरल बग्दछ इन्द्रावतीु, योगी आनन्द अरुणको सन्त गाथाु र लक्ष्मीप्रसाद देवकोटाका उत्कृष्ट कविताहरूको अडियो बुक सार्वजनिक गरिसकेका छन् ।

नेपालीले अडियो बुकका धेरै विशेषता ठम्याएका छन् । जस्तो गृहिणीले भान्सामा खाना बनाउँदै गर्दा सुन्न सक्छन् । दृष्टिविहीन र आँखा उस्तो नदेख्ने वृद्धवृद्धा लाभान्वित हुने नै भए । व्यस्त जीवनशैली बाँचेका जागिरेहरूले पनि गाडी हाँक्दा, अभ्यास गर्दा वा होलिडेमा सुन्न सक्छन् ।

इकान्तिपुर अनलाइनबाट