Mon. Aug 26th, 2019

बूढीगण्डकी आयोजनाको ढाँचा नबन्दै ३६ अर्ब खर्च

१९ साउन, धादिङ –


बूढीगण्डकी जलविद्युत् आयोजनामा हालसम्म ३६ अर्ब २० करोड ३८ लाख खर्च भइसकेको पाइएको छ।

आयोजना सुरु गर्ने लक्ष्यका साथ तत्कालीन प्रधानमन्त्री डा बाबुराम भट्टराईले विकास समिति गठन गरेदेखि हालसम्म उक्त परिमाणको रकम खर्च भएको हो।

सुरुताका आयोजना स्वदेशी लगानीमा निर्माण गर्ने कि विदेशी भन्नेमै विवाद थियो। पछिल्लो समय सो आयोजना निर्माणका लागि एक चिनियाँ कम्पनीसँग आवश्यक परामर्शका लागि मन्त्रिपरिषद्ले ऊर्जा, जलस्रोत तथा सिँचाइ मन्त्रालयलाई जिम्मा दिएको थियो। तीनपटक चिनियाँ कम्पनी गेजुबासँग छलफल भए पनि हालसम्म कुनै निष्कर्ष निस्कन सकेको छैन।

आयोजना कहिले, कसरी र कुन ढाँचामा अगाडि बढ्ला भन्ने चासो कायमै छ। आयोजना प्रभावित क्षेत्रका लागि सरकारले निर्धारण गरेको मुआब्जा वितरणको कार्य जारी छ। ऊर्जा, जलस्रोत तथा सिँचाइ मन्त्रालयका अनुसार आर्थिक वर्ष ०७५/७६ सम्म २६ अर्ब ५० करोड ३१ लाख बराबर मुआब्जा वितरण भएको छ।

सरकारले आयोजनालाई राष्ट्रिय गौरवमा समेत सूचीकरण गरेको छ। मन्त्रालयका अनुसार आव ०७५र७६ मा मात्रै ६ हजार १६ जना स्थानीय प्रभावितलाई ११ अर्ब ३१ करोड नौ लाख रुपैयाँ मुआब्जा वितरण भएको छ। यस्तै आव ०७४/७५ मा पाँच हजार एक सय दुईजना स्थानीय प्रभावितलाई १० अर्ब ८४ करोड २२ लाख र आव ०७३/७४ मा एक हजार नौ सय ९३ जना जग्गाधनीलाई चार अर्ब ३५ करोड बराबर मुआब्जा वितरण भएको छ। यस आधारमा गत असार मसान्तसम्म १३ हजार एक सय ११ जग्गाधनीका ४४ हजार एक सय २० रोपनी बराबरको मुआब्जा वितरण भइसकेको छ।

आव ०७५र७६ मा उपलब्ध भएको १७ अर्ब ९९ करोड ९६ लाख बजेटमा आयोजनाले संशोधित बजेट १० अर्ब ६९ करोड ७९ लाख प्राप्त गरेको थियो। त्यसमा नौ अर्ब ७९ करोड ९० लाख बराबरको खर्च भएको छ। यस आधारमा हेर्दा कुल भौतिक प्रगति ९१.५० प्रतिशत र वित्तीय प्रगति ९१.५१ प्रतिशत रहेको ऊर्जा, जलस्रोत तथा सिँचाइ मन्त्रालयका सचिव दिनेशकुमार घिमिरेले ‘मन्त्रालयस्तरीय विकास समस्या समाधान समिति बैठक’मा यही साउन १६ गते पेस गरेको विवरणमा उल्लेख छ।

सचिव घिमिरेका अनुसार विस्तृत आयोजना प्रतिवेदन ९डिपिआर० तयार भइसकेको आयोजना निर्माणमा जान सक्ने अवस्थामा रहेको छ। डुबान क्षेत्रको गोरखा जिल्लातर्फ ३० हजार ७८ रोपनीमध्ये आरुघाट र आर्खेत बजार क्षेत्र बाहेक र धादिङ जिल्लातर्फ २८ हजार ७५ रोपनीमध्ये आरुघाट र खहरे बजारबाहेकका क्षेत्रका जग्गाको मुआब्जा निर्धारण भइसकेको छ।

गोरखा र धादिङका १३ हजार एक सय ११ जग्गाधनीलाई ४४ हजार एक सय २० रोपनी जग्गाको मुआब्जा वितरण भइसकेको छ। मुआब्जा निर्धारण हुन बाँकी रहेको गोरखाको आरुघाट र आर्खेत तथा धादिङतर्फ आरुघाट र खहरे बजारको पनि मुआब्जा निर्धारण हुन बाँकी छ।

दुवै जिल्ला प्रशासन कार्यालयले सहायक प्रमुख जिल्ला अधिकारीको संयोजकत्वको टोलीले मुआब्जा निर्धारण गरिसके पनि सरकारले दिन सक्ने मुआब्जा रकम र स्थानीयको मागबीचको तालमेल हुन नसक्दा सार्वजनिक हुन सकेको छैन।

बूढीगण्डकी आयोजना सरोकार समितिका संयोजक हरेराम ढकालले मुआब्जा निर्धारण हुन नसकेका क्षेत्रको तत्काल मुआब्जा निर्धारण गर्न माग गरेपनि सुनुवाइ हुन नसकेको गुनासो गरे। काठमाडौं, पोखरा, चितवनजस्ता बढी विद्युत् माग भएका क्षेत्रको बीचमा पर्ने भएकाले पनि आयोजना रणनीतिक महत्वको छ।

आयोजनाका लागि मात्रै नेपाल आयल निगमले गत असार मसान्तसम्म करिब ३२ अर्ब बराबरको रकम जम्मा गरिसकेको छ। भन्सार बिन्दुमा नै पेट्रोलियम पदार्थमा पूर्वाधार कर लगाएर उक्त परिमाणको रकम संकलन गरिएको निगमले जनाएको छ।

ऊर्जा, जलस्रोत तथा सिँचाइ मन्त्री वर्षमान पुनका अनुसार आयोजना कुन ढाँचामा कसरी अगाडि बढाउने भन्ने बारेमा सरकारले आवश्यक परामर्श गरिरहेको र निकट भविष्यमा नै टुंगो लाग्नेछ। सरकारले आयोजनालाई इन्जिनियरिङ खरिद निर्माण तथा वित्तीय व्यवस्थापन ९इपिसिएफ० ढाँचामा अगाडि बताउँदै आएको छ।


२०७६ साउन १९ गते प्रकाशित

Loading...