पाँचथरमा आगलागी हुँदा दुई जनाको मृत्यु, दुई घाइते

पाँचथर– पाँचथरको फिदिम नगरपालिका वडा नं ८ घुमाउनेटारमा गएराति एक घरमा आगलागी हुँदा दुई जनाको जलेर मृत्यु भएको छ। दुई जना घाइते भएका छन्।

स्थानीय मेघबहादुर गुरुङको घरमा गए राति १:३५ बजे अचानक आगलागी हुँदा उनकी बुहारी २३ वर्षीया आसाङसिं थेवे र २२ वर्षीया छोरी ममता गुरुङको जलेर मृत्यु भएको जिल्ला प्रहरी कार्यालयका प्रहरी नायब उपरीक्षक हरि खतिवडाले जानकारी दिए।

आगलागीमा परी मेघबहादुर र विजेन्द्र गुरुङ घाइते भएका छन् । घरभित्रै रहेका तीनजना भने भाग्न सफल भएका थिए। आगलागीबाट घर पूर्णरूपमा क्षति हुँदा त्यहाँ भएको अन्नपात, गरगहना, किराना पसलसमेत गरी अनुमानित ५० लाख बराबरको धनमाल क्षति भएको हुनसक्ने उनले बताए।