Wed. Apr 17th, 2024

केही महिनाभित्रै कांग्रेसको नेतृत्वमा नयाँ सत्ता गठबन्धन बन्छ : शेखर कोइराला

काठमाडौं -प्रमुख प्रतिपक्ष दल नेपाली कांग्रेसका नेता डा। शेखर कोइरालाले केही महिनाभित्रै वर्तमान सत्ता गठबन्धन टुट्ने दाबी गरेका छन् । उनले केही महिनापछि फेरि अर्को गठबन्धन बन्ने जिकिर गरेका हुन् ।

विपक्षी भएको नाताले कांग्रेसले सत्तामा जान कोसिस गरिरहने र त्यो केही महिनाभित्रै सफल हुने नेता कोइरालाको भनाइ थियो । “फेरि अर्को गठबन्धन बन्छ केही दिनपछि, केही महिनापछि । पक्कै बन्छ । किन हामी विपक्षमा छौँ,” शनिबार काठमाडौंमा आयोजित एक कार्यक्रममा उनले भने, “हामी कोसिस गरिराखेका हुन्छौँ सत्तामा जानका लागि । त्यो स्वाभाविक हो ।”

उनले गठबन्धन बन्ने र भत्कने विषयले देश नबन्ने बताए । यसलाई रोक्न निर्वाचन प्रणालीमा नै सुधार गर्नुपर्ने प्रस्ताव समेत उनले गरे । “यसरी देश अगाडि बढन सक्दैन,” उनले भने, “हाम्रो निर्वाचन प्रणाली नै यस्तो छ कि कुनै पनि दलको बहुमत आउनै सक्दैन । गठबन्धनमा जानैपर्ने हुन्छ ।”

राष्ट्रियसभामा समावेशी समानुपातिक प्रतिनिधित्व गराउने र प्रतिनिधिसभामा प्रत्यक्ष निर्वाचित हुने प्रणाली अवलम्बन गरे मात्र कुनै एक दलले बहुमत ल्याउने र मुलुकमा राजनीतिक स्थायित्व र विकास, निर्माणको कामले गति लिन सक्ने नेता कोइरालाले बताए ।

About The Author

Loading...

अन्य समाचारहरु: