धादिङ– सदरमुकाम धादिङबेसीमा समावेशी विपद जोखिम न्युनीकरण सम्बन्धि २ दिने अभिमूखीकरण कार्यक्रमबाट सुरु भएको छ ।
भुकम्प प्रभावित नगरपालिकाहरुमा स्वास्थ्य क्षेत्र तथा समुदाय उत्थानशीलता सुदृढीकरण परियोजना अन्तर्गत समावेशी विपद जोखिम न्युनीकरणलाई स्थानीय तहका योजना तथा कार्यक्रममा मुलप्रभाहीकरण गरी समुदायको उत्थानशीलता गर्ने कार्यक्रमको मुख्य उद्देश्य रहेको छ । ह्याण्डिक्याप इन्टरनेशनल र अपाङ्ग कल्याण संघको संयुक्त आयोजनामा २ दिने अभिमूखीकरण कार्यक्रम शुरु गरीएको हो ।
कार्यक्रममा विपद जोखिम न्युनीकरण तथा व्यवस्थापनमा राष्ट्रिय तथा अन्तराष्ट्रिय स्तरमा भएका नितिगत व्यवस्था, विपद व्यवस्थापन र जलवायु परिर्वतन अनुकुलनको अवधारणा, संकटासन्न व्यक्ति तथा समुहको समावेशीता, स्थानीय तहमा भए गरेका क्रियाकलापहरु, आगामी योजना, सामाजिक संरक्षणका प्रावधानहरुलाई समावेशी विपद जोखीम न्युनीकरणमा समाहित गराउने विषयमा छलफल भैरहेको छ । २ दिन सम्म सञ्चालन हुने कार्यक्रममा स्थानीय तहका प्रतिनिधी, कर्मचारी तथा संचारकर्मीहरुको सहभागिता रहेको छ ।
कार्यक्रममा नीलकण्ठ नगरपालिकाका उपमेयर मनराज भण्डारीले विपद जोखिम न्युनीकरण अभियानमा अपाङ्गता भएकाहरुलाई पनि समेटेर कार्यान्वयनमा लैजाने बताए । विपत्तिमा झन जोखिममा हुने हुदा अपाङ्गता भएकाहरुलाई विशेष प्राथमिकता दिनु पर्ने उनकोभनाई छ । निति नियम बनाउदा देखि कार्यान्वयन चरणसम्म अपाङ्गता भएकाहरुलाई प्राथमिकतामा राख्नु पर्ने नेपाल पत्रकार महासंघ जिल्ला शाखा धादिङका अध्यक्ष राजाराम शर्माले बताए ।
‘अपाङ्गता भएकै कारण सरकारले दिने सेवा तथा सुविधाबाट उनीहरु बञ्चित छन् । विपत्तिको समय झनै जोखिममा परिरहेका हुन्छन् । प्राकृतिक प्रकोपलाई रोक्न सकिदैन । तर पूर्व तयारी गर्न सके त्यस्ता प्रकोपहरुबाट हुन सक्ने विपत्तिलाई कम गर्न र निति बनाउने तथा कार्यान्वयनमा पनि उस्तै जोड दिन सके जोखिम र विपत्ति कम गर्न कार्यक्रमले सहयोग पुग्नेछ’ अध्यक्ष शर्माले भने । अन्तरक्रियाको पहिलो दिन, अपाङ्गताको प्रकार, राज्यले दिने सेवा तथा सुविधा, विपतको समयमा राहत तथा उद्धार, स्थानीय तहमा हुने योजना तथा कार्यान्वयनको पहँुचका विषयमा छलफल गरिएको छ ।
