धादिङ : नेकपा एमालेले धादिङको जिल्लाको तीन वटा स्थानीय तहमा उम्मेदवारको टुंगो लगाएको छ । जिल्लाको गल्छी, सिद्धलेक र गंगाजमुना गाउँपालिकामा उम्मेदवार टुङ्गाएको छ ।
गल्छी गाउँपालिका अध्यक्षमा केदार खतिवडा र उपाध्यक्षमा राधा तिमिल्सीनालाई उम्मेदवार बनाउने निर्णय गरिएको छ । खतिवडा २०५४ सालमा एमालेबाट निर्वाचित कल्लेरी गाउ“विकास समिति अध्यक्ष एवम् गल्छी गाउँ कमिटका अध्यक्ष हुन् भने तिमिल्सीना यसअघि गल्छी गाउँपालिकाका निर्वाचित उपाध्यक्ष हुन् ।
सिद्धलेक गाउँपालिका अध्यक्षमा पुनः प्रेमनाथ सिलवाल र उपाध्यक्षमा कमला शर्मा उम्मेदवार बन्ने भएको छ । यसअघि पनि अध्यक्ष र उपाध्यक्ष भएर ५ वर्षीय कार्यकाल पूरा गरेका सिलवाल र शर्मा नै यसपटक पनि उम्मेदवार बनेका छन् ।
त्यस्तै गंगाजमुना गाउँपालिका अध्यक्षमा भक्तबहादुर लामिछाने र उपाध्यक्षमा एन्जीला तामाङलाई सर्वसम्मत उम्मेदवार बनाउने गाउँ कमिटिले निर्णय गरेको छ । लामिछाने वडा अध्यक्ष हुन् भने तामाङ गाउँपालिका उपाध्यक्ष हुन् ।
एमालेले केही वडाहरुको उम्मेदरवार समेत टुङगो लगाएको छ । अन्य स्थानीय तह र वडाहरुको उम्मेदवार बेलुकासम्ममा टुंगो लगाउने नेकपा एमाले धादिङका सचिव राधिका सापकोटाले जानकारी दिइन् । आकांक्षी धेरै भएका कारण उम्मेदवार टुंगो लगाउन सकस परेको बताइएको छ । स्थानीय तह निर्वाचनका लागि आइतबार र सोमबार उम्मेदवारी दर्ता तोकिएको छ । तर उम्मेदवारी दिने दिनसम्म पनि दलहरुलाई उम्मेदवार छान्नै सकस परेको छ ।
