आज बडा दशैंको पाँचौ दिन हो । धार्मिक मान्यताअनुसार स्कन्दमाताको पूजाआजा गरेर मनाईंदैछ । आजका दिन हिन्दु धर्मावलम्बीहरुले जमरा घर र पूजा कोठामा माता स्कन्दमाताको पूजा आरधना गर्छन् ।
भगवान स्कन्दकुमार कार्तिकेयको बालस्वरुपलाई सदैव काखमा राखी ममतामयी स्नेह प्रदान गर्ने हुनाले उनलाई स्कन्दमाताको नामबाट पुकार्ने गरिएको हो । स्कन्दमाताले आफ्ना चार हातमध्ये दायाँतर्फको माथिल्लो हातले स्कन्दकुमार कीर्तिकेयलाई काखमा च्यापेर बायाँतर्फको तल्लो हातमा कमलको फूल र माथिल्लो हातले बरमुद्रा धारण गरेकी हुन्छन् । उनको वाहन सिंह हो ।
आज पनि देशभरका शक्तिपीठ र देवी मन्दिरमा बिहानैदेखि पूजाआजा गर्नेको भीड लागेको छ । काठमाडौंको गुह्वेश्वरी, मैतीदेवी, दक्षिणकाली, कालिकास्थान, शोभा भगवती, तलेजुभवानी, बिजेश्वरी, नक्साल भगवती, भद्रकालीलगायत देवी दुर्गाका शक्तिपीठहरुमा घटस्थापनाको दिनदेखि पूजा गर्ने गरिन्छ ।
