काठमाडौ – यस वर्षको शरद् ऋतुमा हिमाल आरोहणका लागि अहिलेसम्म तीन सय २९ जनाले अनुमति लिएका छन् । पर्यटन विभागका अनुसार हिमाल आरोहणका लागि अहिलेसम्म ३२ वटा समूहका दुई सय ४६ पुरुष र ८३ महिला गरी तीन सय २९ जनाले अनुमति लिएका हुन् ।
सबैभन्दा धेरै मनास्लु हिमाल आरोहणका लागि दुई सय ९० जनाले अनुमति लिएका छन् । यस्तै पुथा हिउँचुली आरोहणका लागि नौ जना, अन्नपूर्ण–चारका लागि पाँच, थाकर गो इस्टका लागि चार, धौलागिरि प्रथमका लागि १४, फुङ्गीका लागि पाँच र कुम्भकर्ण हिमाल आरोहणका लागि दुई जनाले अनुमति लिएका विभागले जनाएको छ ।
यस्तै हिमाल आरोहणका लागि अनुमति लिनेहरूबाट अहिलेसम्म तीन करोड ७४ लाख ४३ हजार नौ सय पाँच रुपैयाँ रोयल्टी प्राप्त भएको छ ।अघिल्ला वर्षमा झैं यो वर्ष पनि मनास्लु हिमाल आरोहणमा आरोहीको आकर्षण देखिएको छ । शरद् ऋतु मनास्लु हिमाल आरोहणका लागि उपयुक्त मौसम मानिन्छ ।
