काठमाडौं -युनाइटेड अरब इमिरेट्स (यूएई) सरकारले नेपाली कामदारले हराएका ५३२ थान पासपोर्ट नेपाली दूतावासलाई बुझाएको छ । वैदेशिक रोजगारीमा गएका नेपालीले विभिन्न समयमा हराएका पासपोर्ट यूएईको वैदेशिक मामिला महानिर्देशनालय (दुबई)ले नेपाली दूतावासले बुझाएको हो ।
नेपाली कामदारले हराएका पासपोर्टहरू भेटिएपछि महानिर्देशनालयले संकलन गरेर राखेको थियो । संकलन भएका ५३२ थान पासपोर्ट एकसाथ अबुधाबीस्थित नेपाली दूतावासलाई बुझाइएको हो ।
हराएका पासपोर्ट प्राप्त गरेपछि नेपाली दूतावासले सूचना प्रकाशित गरेर यथाशीघ्र आफ्नो पासपोर्ट संकलन गर्न आउन अनुरोध गरेको छ ।
“राहदानी संकलन गर्न आउँदा व्यक्ति स्वयम् आफ्नो नागरिकताको फोटोकपी लिएर आउनुपर्ने बेहोरासमेत जानकारी गराइन्छ,” दूतावासले भनेको छ ।
यूएईले अवैध विदेशी कामदारलाई वैध हुन दुई महिनाको समय दिँदै ‘एम्नेस्टी (आममाफी) २०२४’ कार्यक्रम घोषणा गरेपछि भेटिएका पासपोर्ट नेपाली दूतावासलाई हस्तान्तरण गरेको हो । यूएईले सेप्टेम्बर र अक्टोबर महिनामा अवैध रहेका कामदारलाई वैध बन्न एम्नेस्टी घोषणा गरेको छ । आफ्नो साथमा पासपोर्ट नहुने, भिसा अवधिभन्दा बढी बस्ने, सम्झौता गरेको कम्पनी छोडेर अन्यत्र काम गर्ने कामदारहरू यूएईमा अवैध मानिन्छन् ।
अबुधाबीस्थित नेपाली दूतावासका अनुसार, यूएईमा लगभग १० हजार नेपाली विभिन्न कारणले अवैध छन् ।
