धादिङ । धादिङ उद्योग वाणिज्य संघको वरिष्ठ उपाध्यक्ष पदमा रोहित भण्डारी सर्वसम्मत निर्वाचित भएका छन् ।
जिल्लामा क्रियाशिल विभिन्न राजनीतिक दल र दलसँग जोडिएका व्यवसायीहरुबीचको लामो छलफल र बहसपछि भण्डारी निर्विरोध निर्वाचित भएका हुन् ।
विधानमा व्यवस्था भएबमोजिम वरिष्ठ उपाध्यक्ष नै आगामी कार्यकालका लागि स्वतः अध्यक्ष हुने प्रावधान छ । यो प्रावधान अनुसार अध्यक्ष पदका लागि मतदान गर्नु पर्दैन । तर, वरिष्ठ उपाध्यक्षमा भने रस्साकस्सी हुने गरेको छ । १०औं अधिवेशनबाट वरिष्ठ उपाध्यक्षमा निर्वाचित रामकुमार डल्लाकोटी ११औं अधिवेशनबाट स्वतः अध्यक्ष बनेका छन् ।
भण्डारीको प्यानलबाट सबैं पदमा सर्वसम्मत चयन भएपनि वरिष्ठ उपाध्यक्ष पदमा भने दुइ जनाको उम्मेद्वारी परेको थियो । वरिष्ठ उपाध्यक्ष पदमा उम्मेदवारी दिएका अर्का उम्मेद्वार सुदर्शन रिजालले आफ्नो उम्मेद्वारी फिर्ता लिएसंगै भण्डारी सर्वसम्मत वरिष्ठ उपाध्यक्षमा निर्वाचित भएका हुन् ।
शुक्रबार मध्यरातमा सुदर्शन रिजाल र रोहित भण्डारीबीच सहमति जुटेको हो । धादिङ उद्योग वाणिज्य संघमा सुदर्शन रिजालले उठाएका एजेण्डाहरुलाई रोहित भण्डारीको टिमले समेटेर लैजाने कुरामा भण्डारीले सहमति जनाएका छन् ।
सहमति गराउनको लागि धादिङ उद्योग बाणिज्य संघका वर्तमान कार्यसमिति पदाधिकारी तथा विभिन्न राजनैतिक दलका नेतृत्वहरु लागिपरेका थिए । यो संगै धादिङ उद्योग वाणिज्य संघको ११आंै अधिवेशनबाट चुनिने सबै पदहरु सर्वसम्मत भएको छ ।
संघको विधान बमोजिम ३३ सदस्यीय कार्यसमितिमा अध्यक्ष र वरिष्ठ उपाध्यक्षसहित चार उपाध्यक्ष, एक महासचिव, तीन सचिव, एक कोषाध्यक्ष गरी ११ जना पदाधिकारी रहने व्यवस्था छ । विधानमा व्यवस्था भएअनुरुप हाल सदस्यमा निर्वाचितहरुबाटै अध्यक्षले पदाधिकारी मनोनित गर्नेछ ।
