काठमाडौं- राष्ट्रिय सभाका सदस्य वामदेव गौतमले पूर्वराजा ज्ञानेन्द्र शाहलाई राजनीति गरेर प्रधानमन्त्री बन्न सुझाएका छन् ।
ज्ञानेन्द्रलाई फेरि राजा बन्ने चाहना परित्याग गर्न पनि सुझाव दिएका छन् । आइतबारको राष्ट्रियसभा बैठकमा बोल्दै नेता गौतमले पूर्वराजा शाहलाई दल खोलेर निर्वाचन आयोगमा दर्ता गराउन पनि सुझाव दिए ।
‘तपाईंले फेरि राजा बन्ने चाहना त्यागी आफ्नो नेतृत्वमा एउटा प्रजातान्त्रिक राजनीतिक दल खोलेर निर्वाचन आयोगमा दर्ता गराउनुस्’, उनले भने, ‘२०८४ मा हुने निर्वाचनमा भाग लिनुस् । निर्वाचित भई संसद्बाट प्रधानमन्त्री बनेर नेपालको चौतर्फी विकास र समृद्धि गरिदिनुस् ।’
पूर्वराजाले फागुन ७ को शुभकामना दिने क्रममा अब विकल्पको समय आएको बताएका थिए । उनले दलहरूले पूर्वसहमति सम्झिएर देशलाई निकास दिन आफूलाई अघि सार्नुपर्ने धारणा राखेका थिए । त्यसलाई लिएर आइतबार संसद्का दुवै बैठकमा कडा टिप्पणी भइरहेका छन् ।
