काठमाडौं– पूर्वमिस नेपाल तथा मोडल अस्मी श्रेष्ठले प्रेमीसँग आउँदो सोमबार विवाह गर्ने भएकी छन् । इन्स्टाग्रामबाट यसबारे जानकारी दिँदै उनले अप्रिल २१ (बैशाख ८ गते) विवाह गर्न लागेको जनाएकी छन् ।
अस्मी र उनका प्रेमी सशांकलाल श्रेष्ठबीच २०८० साल पुस २० गते अमेरिकाको न्यूयोर्कमा इन्गेजमेन्ट भएको थियो । इन्स्टामा दुईजनाको रोमान्टिक फोटो सेयर गर्दै अस्मी लेख्छिन्, ‘ हाम्रो परिवारको आशीर्वाद र मायाले भरिएको हृदयले, हामी विवाह बन्धनमा बाँधिँदैछौं ।’
अस्मीलाई कलाकार, मोडल र खेल क्षेत्रका सेलिब्रेटीले वैवाहिक जीवन सुरुवात गर्न लागेकोप्रति बधाइ दिइरहेका छन् । इन्गेजमेन्ट गर्दा न्यूयोर्कको समुन्द्री किनारको आकर्षक लोकेसन सेयर गरेका अस्मी र उनका प्रेमीले यसपटक भने नेपालको पहिचान झल्कने वास्तुकला परिसरको तस्वीरमा फोटो खिचेका छन् ।
कामको कुरा गर्दा, अस्मी होस्ट र जजको रुपमा देखिन लागेको टेलिभिजन कार्यक्रम ‘नेपाल्स नेक्स्ट टप मोडल’ हिमालय टिभीबाट प्रसारणको तयारीमा छ ।
