राजावादीमाथि थापाको कटाक्ष: वियर चोरेर व्यवस्था परिवर्तन हुँदैन

नेकपा एमालेका सांसद सूर्यबहादुर थापा क्षेत्रीले राष्ट्रिय प्रजातन्त्र पार्टी (राप्रपा) का सांसदहरुलाई सपनाबाट ब्यूँझिन आग्रह गरेका छन् । आजको प्रतिनिधिसभा बैठकमा बोल्दै उनले बियर चोरेर व्यवस्था नबदलिने भन्दै कटाक्ष गरे ।

तीनुकने घटनापछि राजावादीहरुको असलियत उदांगो भएको बताउँदै थापाले लुटपाट गरेर व्यवस्था बदल्ने सपना नदेख्न सुझाव दिए । उक्त घटनामा संलग्नलाई कडा कारवाही गर्न उनले मागसमेत गरेका छन् ।

‘संविधान बमोजिम यही सदनमा सपथ खाएका हामीमध्येकै केही साथीहरुलाई लोकतन्त्र र गणतन्त्र हैन, वंशाणुगत र कतिथ राजा चाहिएको छ’, सांसद थापाले भने, ‘तर तीनकुने काण्डले राजावादीहरुको असलयित स्पष्ट भइसक्यो । लुटपाट, आगजनी, डकैतीबाट व्यवस्था बद्लिदैँन, वियर चोरेर पनि व्यवस्था बद्लिदैँन ।’

प्रदर्शनको दिन कार्यकर्तालाई उक्साउने नेताहरु अहिले ‘पानीमाथिको ओभानो’ बन्न खोजिरहेको थापाको भनाई छ । ‘पार्टीका सांसदहरु, वरिष्ठ नेता, महामन्त्रीहरु आफैँ सहभागी हुने, अनि घटनाको जिम्मेपारी लिन पर्नेबेला चाहिं पानीमाथिको ओभानो हुन खोज्ने, यस्तो गर्न मिल्छ ? निद्राबाट जाग्नुस् र यर्थाथलाई आत्मसात स्वीकार गर्नुस्’, उनले थपे ।

सांसद थापाले सत्ता साझेदार दल नेपाली कांग्रेसका सांसदहरुलाई सरकारको आलोचना गर्दै हिँड्नुभन्दा सुझाव दिन आग्रह गरे । कांग्रेसका कतिपय नेताहरुले सरकारप्रति आक्रोश पोखिरहेको सन्दर्भमा उनको यस्तो प्रतिक्रिया आएको हो ।

‘विद्युत प्राधिकरणबाट कुलमानलाई हटाउने प्रस्ताव त उर्जामन्त्रीकै हो नि, उहाँ कांग्रेसकै होइन र ?’, थापाले सोधे, ‘मन्त्री र राज्यमन्त्रीलाई हटाउने कुरा प्रधानमन्त्रीको स्वेच्छाकारी विषय होइन, गठबन्धनमा भइसकेपछि नेतृत्वसँग बुझेरमात्र बोल्न आग्रह गर्छु ।’