काठमाडौं । ऊर्जा, जलस्रोत तथा सिचाइमन्त्री दिपक खड्काले उद्योगहरूले प्रयोग गरेको विद्युतको बक्यौता असुल गर्न विद्युत प्राधिकरणलाई निर्देशन दिएका छन् ।
नेपाल विद्युत प्राधिकरणको ४०औं वार्षिकोत्सवको अवसरमा आइतबार काठमाडौंमा आयोजित कार्यक्रममा ऊर्जामन्त्री खड्काले डेडिकेटेड र ट्रंकलाइनको विषयमा प्राधिकरण लामो समय अल्मलिएर बसेको भन्दै छिटोभन्दा छिटो बक्यौता असुल गर्न निर्देशन दिए ।
उद्योगीहरूले उपयोग गरेको विद्युत बापतको महशुल उठाउने क्षमता प्राधिकरणले राख्नुपर्ने भन्दै खड्काले विद्युत उत्पादनसँगै सुरक्षित प्रवाह गर्न सक्ने क्षमताको अभिवृद्धि गर्ने लक्ष्यका साथ प्राधिकरणले काम गर्नुपर्नेमा जोड दिए ।
सरकारले सबैभन्दा चाँडो मुलुकलाई समृद्ध बनाउने क्षेत्रका रूपमा ऊर्जा क्षेत्रलाई देखेकाले यसको विकासका लागि सबैको साथ र सहयोग आवश्यक रहेको उनको भनाइ छ ।
