अभिनेत्री स्वस्तिमा खड्का र गायक प्रकाश सपुतबीच पानी बारबारको अवस्था सिर्जना भएको चर्चा पछिल्लो समय व्यापक छ । चार महिनाअघि ‘वसन्त’ प्रदर्शन हुँदा दुई जनाबीच खटपट भएको हल्लाले अहिले आएर चलचित्रवृत्त गर्माएको हो ।
तर, के साँच्चै स्वस्तिम र प्रकाशबीच झगडा परेकै हो त ? जिज्ञासा पैदा भैरहँदा उक्त हल्लालाई परास्त पार्नेगरी दुई जनाले जुठो खाएका छन् । हालै सार्वजनिक एक भिडिओमा प्रकाश र स्वस्तिमाले एउटै गिलासको पानी खाएर सम्बन्धमा कुनै समस्या नरहेको सन्देश दिएको देखिन्छ ।
चलचित्र ‘हरिबहादुरको जुत्ता’को प्रचारात्मक उक्त भिडिओमा प्रकाशले भोलि (सोमबार) सार्वजनिक हुने गीत सुन्दिन/हेर्दिन आग्रह गरेका छन् भने स्वस्तिमाले चलचित्रको प्रदर्शन मितिबारे जानकारी गराएकी छन् । सो क्रममा प्रकाशले पिइरहेको पानी स्वस्तिमाले पिउँछिन्, र पुनः प्रकाशले पिएको देखिन्छ ।
‘हरिबहादुरको जुत्ता’मा वरिष्ठ कलाकार हरिवंश आचार्य, प्रियंका कार्की, स्वस्तिमा खड्का, प्रकाश सपुत, किरण केसी, राजाराम पौडेल लगायतको अभिनय रहेको बताइएको छ ।
