काठमाडौं, कात्तिक १४ (नागरिक)- नेकपा एमालेले पार्टी मुख्यालय बल्खुमा दशैँ, तिहार, नेपाल संवत् नयाँ वर्ष, छठ, इदका अवसरमा चियापान समारोह आयोजना गर्यो। चियापान कार्यक्रममा विभिन्न दलका शीर्ष नेताहरुसहित बुद्धिजीबी तथा सञ्चारकर्मीहरु सहभागी थिए।नागरिकन्युजका केशव थोकरले खिचेका तस्बिरहरु हेर्नुस् : एमालेका तत्कालीन पार्टी अध्यक्ष तथा विपक्षी दलका नेता मनमोहन अधिकारीले यस प्रकारको कार्यक्रमको थालनी गरेका थिए। एमाले अध्यक्ष झलनाथ खनालले सोही कार्यक्रमको निरन्तरता दिएका हुन्।
एमाले उपत्यका विशेष समन्वय कमिटीको व्यवस्थापनमा मध्याह्न १२ बजेदेखि दिउँसो ४:३० बजेसम्म चलेको कार्यक्रममा प्रधानमन्त्री बाबुराम भट्टराई, एनेकपा (माओवादी)का अध्यक्ष पुष्पकमल दाहाल, नेपाली काँग्रेसका सभापति सुशील कोइराला, उपप्रधानमन्त्रीद्वय नारायणकाजी श्रेष्ठ र विजयकुमार गच्छदार सहभागी भए।
यसैगरी तराई-मधेस लोकतान्त्रिक पार्टीका अध्यक्ष महन्थ ठाकुर, राष्ट्रिय जनशक्ति पार्टीका अध्यक्ष सूर्यबहादुर थापा, नेपाली काँग्रेसका वरिष्ठ नेता शेरबहादुर देउवा र उपसभापति रामचन्द्र पौडेल, पूर्वप्रधानमन्त्री लोकेन्द्रबहादुर चन्द, नेकपा-माओवादीका अध्यक्ष मोहन वैद्य, सद्भावना पार्टीका अध्यक्ष एवम् स्वास्थ्यमन्त्री राजेन्द्र महतो, तराई-मधेस लोकतान्त्रिक पार्टी नेपालका अध्यक्ष एवम् सिँचाइमन्त्री महेन्द्र यादव, सङ्घीय सद्भावना पार्टीका अध्यक्ष तथा उद्योगमन्त्री अनिलकुमार झा, राष्ट्रिय जनमोर्चाका अध्यक्ष चित्रबहादुर केसी, विभिन्न पार्टीका केन्द्रीय पदाधिकारी, नेता, कार्यकर्ताहरूको उपस्थिति थियो।
