१० बैशाख, धादिङ –
सरकारले बुढीगण्डकी जलविद्युत आयोजना कम्पनी मोडलमा नै अघि बढाउने भएको छ । कम्पनी मोडलमा बनाउनका लागि आयोजना विकास समिति विघटन गरिएको छ ।
ऊर्जामन्त्री जनार्दन शर्माको प्रस्तावमा मन्त्रिपरिषद् बैठकको पछिल्लो बैठकले कम्पनी मोडलमा अघि बढाउने गरी विकास समितिको गठन आदेश खारेज गरेको हो । यससँगै औपचारिक रुपमा आयोजनाका समिति भंग भएका ऊर्जा मनत्रालयका प्रवक्ता दिनेश घिमिरेले जानकारी दिए ।
बुढीगण्डकी जलविद्युत आयोजनासँगै नलसिंहगाडका आयोजना समिति पनि भङग भएको छ । नलसिंहगाडमा भ्रष्टाचार भएको भन्दै अख्तियारले आयोजनका अधिकारीलाई मुद्दा दायर गरेको र बुढीगण्डकी अघि बढाउने विषयमा पनि ब्यापक अन्योल रहेको समयमा सरकारको नयाँ निर्णय आएको हो । ‘सरकारले यी दुबै आयोजना कम्पनी मोडलमै बनाउने गरी तयारी थालेको छ । त्यसैले दुबै आयोजनाका विकास समिति भङ्ग गरेका हौं’ प्रवक्ता घिमिरेले भने ।
बढीगण्डकी धादिङ र गोरखामा निर्माण गर्न लागिएको १२ सय मेगावाटको आयोजना हो । त्यस्तै बूढीगण्डकीले डीपीआर तयार गरेर अहिले प्रभावित क्षेत्रमा मुआब्जा वितरण गरिरहेको छ ।
२०७४ बैशख १० गते प्रकाशित
