धादिङ– खेतबारीमा लगाएको अन्नपात र फलफुल बाँदरले सखाप पारेपछि धादिङका किसान आन्दोलित बनेका छन् । वर्षभरी खाने अन्नपात फल लाग्ने बेला बाँदरले वर्सेनि नाश बनाउने क्रम झन बढ्न थालेको किसानहरुले बताएका छन् ।
बादरले नष्ट पारेको मकैको बोटसहित शुक्रबार धादिङको नीलकण्ठ नगरपालिका वडा नं. ९ निगालपानी आसपासका किसानले सदरमुकाम धादिङबेसीमा प्रदर्शन गरेका छन् । मकैको बोटको माला बनाएर घाँटीमा झुण्डाउँदै प्रदर्शनमा उत्रिएका किसानहरुले कृषि मन्त्रीको राजिनामा माग समेत गरेका छन् ।
विगत वर्षहरुदेखि नै बाँदर नियन्त्रणको लागि माग गर्नै आएपनि कुनैपनि सरकारले वेवास्था गरेको उनीहरुको भनाई छ । वर्सेनि खेतबारीमा लगाएको अन्न र फलफुल बाँदरले नष्ट पारिदिएपछि किसान चिन्तित बनेका छन् । बारीमा बाँदरले मकै भाँचेको देखेर आँसु आउँछ । बादर नियन्त्रणको माग गर्दै शुक्रबार धादिङबेसी आइपुगेकी टिका कुमारी श्रेष्ठ भन्छिन्–‘बारीमा जे लगाएपनि बाँदरबाट जोगाउन सकिदैन, बर्सेनि दुःख गर्यो फल खान पाइएन, यो वर्ष पनि अनिकाल पर्ने भयो ।’
अहिले मकैमा चमरा लाग्ने बेला भएको छ । तर, निगालपानी आसपासका किसानले लगाएमो मकैमा बाँदरको रजाई छ । ‘दुःख ग¥यो, मल हाल्यो खेती गर्यो, हुर्कायो । आउला खाउँला, छाक टारौला भन्यो वर्सेनि बाँदरले सखाप बनाउँछ’, किसान देवीप्रसाद रिजाल भन्छन्–‘हाम्रो सरमस्यालाई सरकारले ध्यान दिएन, कि बाँदर नियन्त्रण गरियोस् कि हाम्रो खानेकुराको व्यवस्थापन सरकारले गरिदियोस् ।’
बाँदरले मकै नाश गरेको मकैको बोटकै माला लगाएर किसानहरु सदरमुकाम धादिङबेशीमा रहेका सरकारी कार्यालयहरुको गेट गेटमै नारा लगाउदै हिडेका हुन् ।
