Sat. Oct 31st, 2020

धादिङका पाँच स्थानीय तहमा सुझाब संकलन पेटीका राखियो


२ असोज, धादिङ–


धादिङको पाँच वटा स्थानीय तहहरुमा प्रहरीले गुनासो तथा सुझाव संकलन पेटीका राखेका छन् । जिल्लाको नीलकण्ठ नगरपालिका, धुनीबेसी नगरपालिका, बेनिघाट रोराङ गाउँपालिका, गजुरी गाउँपालिका र गल्छी गाउँपालिकामा सुझाब पेटिका राखिएको प्रहरी उपरीक्षक रविन्द्र रेग्मीले जानकारी दिए । प्रहरी कर्मचारीको कार्य सम्पादन सम्बन्धी गुनासो तथा सुझाब संकलन पेटिका संचालन तथा व्यवस्थापन योजना २०७७ अन्र्तगत राखिएको रेग्मीले बताए ।

प्रहरी सेवालाई थप प्रभावकारी बनाउन बागमती प्रदेश प्रहरी कार्यालय हेटौंडाले धादिङसहित प्रदेशका १० वटा जिल्लाहरुका स्थानीय तहहरुमा सुझाब पेटीका राखेको हो । पहिलो चरणमा बागमती प्रदेश अन्तर्गतका ३१ वटा स्थानीय तहमा प्रहरी कर्मचारीहरुसँग सम्बन्धित गुनासो तथा सुझाव संकलनको लागि गुनासो तथा सुझाव संकलन पेटीका राखिएको हो । प्रदेश प्रहरी अन्तर्गतका १० वटा जिल्लाहरुमा रहेका एक महानगरपालिका, एक उपमहानगरपालिका, २५ वटा नगरपालिका र सदरमुकाम रहेको गाउँपालिका एउटा र राजमार्ग क्षेत्रमा रहेको तीन वटा गाउँपालिका गरी ३१ वटा स्थानीय तहमा गुनासो तथा सुझाव संकलन पेटीका राखिएको हो ।

प्रहरीले पहिलो चरणमा २८ वटा स्थानीय तहमा राख्ने कार्यक्रम तय भएपछि धादिङको राजमार्ग क्षेत्रका तीन स्थानीय तहहरुले पनि राखी ३१ स्थानीय तहहरुमा सुझाव संकलन पेटिका राखिएको गिरीले बताए । दोस्रो चरणमा ७० वटा गाउँपालिका र तेस्रो चरणमा प्रदेश भरीका आठ सय ७४ वटा वडा कार्यालयहरुमा समेत गुनासो तथा सुझाव संकलन पेटीका राखिने कार्यक्रम तय गरिएको छ ।

उजुरी पेटीकामा प्रहरी कार्यालय र प्रहरी कर्मचारीको काम कार्बाहीका सम्बन्धमा गुनासो, सुझाव उजुरी पेटीमा राख्न सक्नेछन् । अन्य क्षेत्रसँग सम्बन्धित रहेका गुनासो तथा सुझाबहरुलाई पनि सम्बन्धित निकायमा पठाइने बागमती प्रदेश प्रहरी कार्यालयले जानकारी दिए । नागरिकहरुले पेटीका मार्फत प्रदान गर्ने गुनासो तथा सुझावलाई प्रदेश प्रहरी कार्यालयले हरेक महिनाको १ गते संकलन गरी त्यस्ता गुनासो तथा सुझावको सम्बोधनको लागि प्रदेश प्रहरी कार्यालयमा उजुरी छानबिन शाखा समेत स्थापना गरेको छ ।

२०७७ असोज २ गते प्रकाशित

Loading...