अब चितवनमा नै तरकारीको परीक्षण

चितवन – तरकारीमा विषादीको प्रयोग बढी पाइएपछि न्यूनीकरण गर्ने उद्देश्यले चितवनको नारायणगढमा प्रयोगशाला स्थापना गरेर तरकारीको परीक्षण गरिने भएको छ ।

काठमाडौँको कालीमाटीमा तरकारी परीक्षणका क्रममा यहाँ उत्पादित तरकारी तथा फलफूलमा विषादी बढी पाइएको पुष्टि भएपछि विषादी प्रयोग न्यूनीकरणका लागि यसरी परीक्षण गर्न लागिएको हो । नारायणगढमा प्रयोगशाला नै स्थापना गरेर परीक्षण गर्न लागिएको जिल्ला कृषि विकास कार्यालयले जनाएको छ । अघिल्लो वर्षको परीक्षणमा चितवनसहित काभ्रे र धादिङमा उत्पादित तरकारीमा समेत बढी विषादी फेला परेको थियो । त्यसैले यी जिल्लामा प्रयोगशाला स्थापना गरेर परीक्षण गर्न जानकारी आएको कार्यालयका योजना शाखा प्रमुख सन्तोषराज पौडेलले जानकारी दिनुभयो ।

काठमाडौँ लगायत पोखरा र बुटवलमा यहाँ उत्पादित तरकारी बढी जाने गरेको छ । पछिल्लो समयमा जिल्लामा व्यावसायिक तरकारीखेती फस्टाउँदै गएको छ । कृषि विकास कार्यालयकाअनुसार अघिल्ला वर्षभन्दा यो वर्ष यहाँ १५ देखि २० प्रतिशतले तरकारीमा विषादीको प्रयोग घटेको पाइएको छ । बाली संरक्षण अधिकृत कमलनाथ वाग्लेले रासायनिक विषादीको प्रयोग घटाएर किसान जैविक विषादीतर्फ आकर्षित भएको पाइएको बताउनुभयो । जिल्लामा जैविक विषादीको उद्योगसमेत सञ्चालन हुन थालेका छन् ।

लाइभ केयर, एग्रीकेयर, जैविक विषादी स्रोत केन्द्रलगायतले यहाँ जैविक विषादी उत्पादन गर्दै आएका छन्, भने किसान आफैँँले जैविक मलसमेत बनाउन सक्रिय भएका छन् । गएको वर्षको तथ्याङ्कमा जिल्लामा खाद्यान्न बालीमध्ये सबैभन्दा बढी तरकारीमा विषादी प्रयोग हुने गरेको पाइएको छ । विभिन्न एग्रोभेटलेसमेत किसानले विषादी खरिद घटाएको जनाएका छन् ।

अघिल्लो वर्ष सार्वजनिक तथ्याङ्कअनुसार प्रयोग भएका विषादीमध्ये तरकारीमा मात्रै करिब ९० प्रतिशत विषादी प्रयोग हुने गरेको थियो । काठमाडाँैमा प्रयोगशाला नै राखेर विषादी परीक्षण हुन थालेपछि किसान सचेत भएका वाग्लेले बताउनुभयो । उक्त तथ्याङ्कमा जिल्लामा प्रतिहेक्टरमा एक हजार ४०० ग्राम विष प्रयोग भइरहेको छ । विषादी प्रयोगका दृष्टिले चितवन २५औँ जिल्लामा पर्छ ।

यहाँ प्राङ्गारिक कृषि खेतीलाई प्रोत्साहन गरिएको र करिब २०० भन्दा बढी किसान तरकारीखेतीमा सक्रिय रहेका वाग्लेले बताउनुभयो । जिल्लामा सबै मौसममा गरेर छ हजार २०० हेक्टर क्षेत्रमा तरकारीखेती हुँदै आएको छ । हलो खबरबाट