Fri. Jul 19th, 2024

वन्यजन्तुले मकै सखाप पारेपछि उदयपुरका किसान केराखेतीमा आकर्षित

उदयपुरको कटारी नगरपालिका–८ का किसानलाई दुम्सी, सुगा र बाँदरबाट खेती जोगाउन समस्या भएपछि उनीहरू वैकल्पिक खेतीमा आकर्षित भएका छन् । मकै, कोदोबालीलाई जङ्गली पशुपक्षीले सखाप पारेपछि उनीहरू केराखेतीमा लागेका हुन् ।

केराखेतीबाट आम्दानी हुन थालेपछि आफूहरू व्यावसायिकरूपमै खेती गर्न थालेको किसान लाखबहादुर राई बताए । ‘चार सय जति केराको बोट लगाएको छु, यसबाट आम्दानी लिन थालको छु’, उनले भने, ‘गत वर्ष पनि झण्डै १ लाखको केरा बेचेँ, यस वर्ष झनै केराखेती बढाएको छु ।’

भोटाङ्गे, मर्चे, जहाजी जातका केराखेती गरिरहेका किसानको मुख्यबजार पहाडी जिल्ला सोलुखुम्बु, ओखलढुङ्गा, खोटाङ बनेको छ । ‘पहाडी जिल्लाका व्यापारी घरमै केरा लिन आउँछन् त्यसैले बजार लैजानुपर्ने झन्झट पनि हटेको छ,’ कटारी–८ ढापटारका किसान रत्नबहादुर विश्वकर्माले भने, ‘फलाएपछि भयो, व्यापारीले बारीबाट आफैं केरा उठाउँछन् ।’

किसान साङ्दोर्जे तामाङले मकै सखाप पार्ने दुम्सी, सुगा चराबाट आजित हुननपरेको बताए । स्थानीय किसानले थोरैमा प्रतिघर बर्सेनि ५० हजारदेखि दुई लाखसम्म केराबाटै आम्दानी लिने गरेका जनाइएको छ । पाखो झाडी सफा गरेर केराखेती सुरु गरेका किसानले यसैलाई पहिलो नगदे बालीका रूपमा मन पराउन थालेको कटारी–८ वडाध्यक्ष नवीन्द्र तामाङले बताए ।

९ रोपनी जग्गामा केराखेती गरिरहेका ढापटारकै मोहन कोइरालाले व्यापारीले बारीमै प्रतिखापा ५० रुपैयाँले लैजाने गर्दा आम्दानी राम्रो भएको बताए । उनले भने, ‘अझै गाउँगाउँसम्म जाने बाटो राम्रो छैन, त्यसैले मूलबाटोसम्म लैजाने बिचौलियाले यहीँको यहीँ ८० रुपैयाँमा खापामा बेच्ने गरेका छन् ।’

वडाध्यक्ष तामाङका अनुसार वडाका हलेदे, मरुवाखानी, केराबारी, पटना, कवासे, गेरु, सिक्रे, ढापटार, वड्मी, माटे, खलङ्गेका गरी ४ सय ५० को हाराहारीका किसानले केराखेती गर्दै आइरहेका छन् ।

About The Author

Loading...

अन्य समाचारहरु: