सरिता श्रेष्ठ, धादिङ –
आठ वर्ष अघि निर्माण कार्य सुरु गरिएको कभर्ड हलले अहिले पूर्णता पाएको छ । लाखौं खर्च गरेर वि.स.२०६४ सालमा धादिङबेसीमा सबैभन्दा पहिले कर्भड हलको निर्माण कार्य सुरु गरिएको थियो । तर त्यो कर्भड हल बीचमा नै अलपत्र परेको थियो । राजनीतिक खिचातानी र बजेट अभावको कारण देखाउदै पहिले सुरु गरिएको कभर्डहलको निर्माण कार्य रोकेपछि पुरानो संरचना ध्वस्त भएको थियो । कभर्डहलको लागि जग हालिए पनि त्यस माथिको संरचना वनाउन नसक्दा जग नै उप्कन थालेको थियो । भने पिल्लरका लागि ठड्याइएको रडहरु भाँचिएको थियो ।
त्यसपछि कभर्ड हललाई पूर्णता दिनका लागि पूरानै ठाँउनिर २०७० साल चैत २० गते फेरी निर्माण कार्य सुरु गरिएको थियो । अलपत्र रहेको कभर्ड हलले अहिले पूर्णता पाएको छ । संविधान सभाका उपाध्यक्ष ओनसरी घर्ती मगरले विधिवत रुपमा शिलान्यास गरी हलको निर्माण कार्य सुरु गरिएको थियो । र अहिले उहाँले नै नवनिर्मित सेमीकभर्ड हलको उद्घाटन गर्नुभएको छ ।
नवनिर्मित सेमी कभर्ड हल नेपाल सरकार युवा तथा खेलकुद परिषद् धादिङ जिल्ला खेलकुद विकास समितिले ३७ लाख १९ हजारमा निर्माण सम्पन्न गरिएको हो । १६ मिटर चौडाई र १८ मिटर लम्बाई क्षेत्रफलमा निर्माण गरिएको हलमा व्याटमिन्टन, भलिबल, कँराते, तेक्वान्दो लगायतका खेलहरु खेल्न सकिने जिल्ला खेलकुद विकास समितिका अध्यक्ष मनराज भण्डारीले जानकारी दिनुभयो ।
सेमी कभर्ड हल २०७१ असार मसान्तसम्म बनाइसक्नुपर्ने थियो । तर कभर्ड हल निर्माण कार्यका लागि आवश्यक सामग्रीहरु ल्याउन ढिलाई भएकाले र ठेकेदारहरुले समयमा काम नगरिदिदाँ तोकिएकै समयमा कभर्ड हल निर्माण हुन सकेन । म्याद थपि थपि अन्तत २०७२ को आर्थिक वर्ष सकिनै लाग्दा निर्माण सम्पन्न गरियो । त्यसलाई हामीले धादिङको खेलकुदको विकासमा उपलब्धिको पाटोको रुपमा लिनु पर्दछ ।
कभर्ड हल निर्माणसँगै धादिङको खेल विकासमा पनि केही उत्साह थपिएको हो की भन्ने अनुमान लगाउन सकिन्छ । सामान्य वर्षात र हावामा समेत खेल खेल्न नसकिने हुँदा आवश्यक अनुसार अभ्यास गर्ने ठाँउको कमी थियो । कभर्ड हल बनेपछि खेलाडीहरुमा पनि उत्सुकता जागेको छ । राष्ट्रको गहना मानिने खेलाडीलाई खेल क्षेत्रमा टिकाउनका लागि त्यसको मर्मत संभार गरे जस्तै बनेको कभर्ड हलको पनि सहि सदुपयोग गर्नु जरुरी छ ।
