धादिङ – धादिङका एक दृष्टिविहिन विद्यार्थी विशिष्ट श्रेणीमा पास भएका छन् ।
धादिङ जिल्लाको थाक्रे – ३, महादेवबेसीमा रहेको श्री जनजागृति उमाविबाट प्रवेशिका परीक्षा एसएलसी दिएका रविन्द्र महतोले ८० प्रतिशत अंक ल्याएका छन् । त्यसै विद्यालयबाट एसएलसी दिएका अन्य २ जना दृष्टिविहिन विद्यार्थीहरु प्रथम श्रेणीमा पास भएका छन् । सँगै एसएलसी दिएका राम रेग्मी र लक्ष्मण रेग्मीले प्रथम श्रेणीमा पास गरेका छन् । उनीहरु मध्ये लक्ष्मणले ७६ दशमलव ७५ प्रतिशत र रामले ७५दशमलव ८७ प्रतिशत अंक ल्याएको विद्यालयले जानकारी दिएको छ ।
दृष्टिविहिन विद्यार्थीहरुले ल्याएको नतिजामा शिक्षक तथा अभिभावक खुसी भएको विद्यालयका शिक्षक रामचन्द्र रुपाखेतीले जानकारी दिनुभयो । अघिल्ला वर्षहरुमा पनि दृष्टिविहिन विद्यार्थीहरुले उत्कृष्ट नतिजा ल्याएका थिए ।
धादिङ जिल्लाभरबाट त्यसै विद्यालयका ३ जना दृष्टिविहिन विद्यार्थीहरु प्रवेशिका परीक्षा एसएलसीमा सहभागी भएका थिए ।
