धादिङ– बागमती प्रदेशका मुख्यमन्त्री एवं नेकपा एकिकृत समाजवादीका उपाध्यक्ष राजेन्द्र प्रसाद पाण्डेले केपी ओलीले कम्युनिष्ट सिध्याउने काम गरेकोले कलम चिन्ह लिएर जनतामाझ पुगेको बताए ।
शनिबार गल्छी गाउँपालिका संगठन कमिटिको प्रथम अधिवेशन उद्घाटन कार्यक्रमलाई सम्बोधन गर्दै पाण्डेले केपी ओलीप्रति कटाक्ष गरेका हुन् । ‘देशलाई भ्रष्टाचारको दलदलमा पुर्यायो, त्यहि कारणले एमाले काम लागेन, अब एमालेले सर्वहारा श्रमजिवि जनताको प्रतिनिधित्व गरेन’ पाण्डेले भने–‘अब हामी कलम चिन्ह लिएर आज तपाइहरुको माझमा आएका हौं ।’
‘अघिल्लो निर्वाचनमा सबै एमालेमा रहँदा धादिङमा तीन वटै निर्वाचन क्षेत्रलाई जितायौं, त्यो जितेको पार्टी काम लागेन, अब कलम चिन्हलाई घर घर पुर्याउनुस्, हरेक आमा बुवालाई चिनाउनुस् अब यसै कलम चिन्हले हाम्रो रक्षा गर्छ’ पाण्डेले कार्यकर्तालाई निर्देशन दिए ।
श्रम तथा रोजगार मन्त्री कृष्ण कुमार श्रेष्ठ ‘किसन’ले श्रमिकका हकहित हितका लागि सरकारले नयाँ नयाँ काम गरिरहेको बताएका छन् । समादवादीले अबको दिनमा जनताको हित हुने काम गर्ने उनले बताए ।
कार्यक्रममा गल्छी गाउँपालिका अध्यक्ष कृष्णहरि श्रेष्ठ, गजुरी गाउँपालिका उपाध्यक्ष सीता ढुंगानासहित नेकपा समाजवादी पार्टीका केन्द्रिय तथा स्थानीय नेताहरुले सम्बोधन गरेका थिए । कार्यक्रममा कलाकारहरुले विभिन्न सांस्कृतिक कार्यक्रम गरेका थिए ।
