शंकर श्रेष्ठ , धादिङ : लागुऔषध (गाँजा) सहित बरामद भएको भारतीय नम्बरको गाडी धादिङ अदालतका न्यायधीस र कर्मचारीहरुले प्रयोग गर्ने गरेको पाइएको छ ।

एक सय ४३ किलो गाँजासहित बरामद गरी विचाराधिन मुद्दामा रहेको बि.आर. ०६ पि. सी ११६७ नम्बरको भारतीय गाडी न्यायधिस र कर्मचारीहरुले व्यक्तिगत काममा प्रयोग गर्ने गरेको भेटिएको हो ।

मुद्दा चलिरहेको केशको कुनै पनि वस्तु न्यायधिसले नै प्रयोग गर्न खोज्नु न्यायिक स्वन्त्रता र निष्पक्षता विरुद्ध मानिन्छ । बरामद भएका कुनै पनि वस्तु वा सवारीसाधन नेपाल सरकारको नाममा हस्तान्तरण नभएसम्म कसैले पनि प्रयोग पाइदैन । तर, प्रमाण सुरक्षित राख्नुपर्ने निकायका जिम्मेवारहरुले नै आचारसंहिता मिच्दै विचाराधिन मुद्दामा रहेको सवारी प्रयोग गरेका छन् ।

न्यायधीस र कर्मचारीहरुले निर्वाध रुपमा प्रयोग गरिरहेको सवारीसाधनका विषयमा सामाजिक संजालहरुमा समेत सार्वजनिक हुन थालेपछि यसले जिल्लाभर चर्चा पाएको छ । बरामद भएर मुद्दा विचाराधिन अवस्थामा रहेको गाडी पटक पटक सडकमा गुडिरहेको देखिएपनि पछिल्लो पटक मंसिर ११ गते प्रयोग गरेर अदालतको मुल ढोका अगाडि पार्किङमा राखिएको तस्बिर सामाजिक संजालमा छ्याप्छ्याप्ती बनेको छ ।

धादिङको वेनिघाट रोराङ गाउँपालिका–२ आँपटारबाट २०८२ असार ३० गते राती अन्दाजी २ बजेर ४५ मिनेटमा १४३ किलो ८४० ग्राम गाँजासहित बि.आर.०६ पि. सी ११६७ नम्बरको भारतीय गाडी प्रहरीले बरामद गरेको थियो । गाँजा र गाडीसँगै पक्राउ परेका प्रतिवादी पुर्पक्षको लागि थुनामा छ । मुद्दा कार्बाहियुक्त अवस्थामा छ ।

विचाराधिन मुद्दाको वस्तुको प्रमाण सुरक्षित राख्नु अदालत र प्रहरीको दायित्व हो । न्यायधीसहरुले कार्यान्वयन गर्नुपर्ने आचारसंहितामा यस्तो वस्तु प्रयोग गर्नु अनियमितता ठहर हुन्छ र आचारसंहिता उल्लंघनमा कार्बाहिमा पर्न सक्छन् ।

नेपाल सरकारले तेल सवारी साधन र ड्राइभर समेत सुविधा दिने गरेको छ । आफ्नो सवारी साधन घरमा आफन्तलाई प्रयोग गर्न दिने र यस्ता गैर कानुनी सवारी साधनहरु प्रयोग गर्ने न्यायाधीश तथा कर्मचारीहरुको आदत बढीरहेको छ ।

गाडी प्रयोग गरेको विषयमा धादिङ अदालतका श्रेस्तेदार राजेन्द्र लुइँटेलले भने मुद्दा पेसी चड्ने प्रक्रियामा रहेको र कार्यालय प्रयोजनको लागि सवारी नभएकोले कसुरजन्य सम्पत्ति अन्तर्गत विभागबाट अनुमति लिनको लागि ट्रायलको रुपमा चलाएको प्रतिक्रिया दिएका छन् ।