धादिङ । दैनिक पाँच घण्टा बन्द गरेर उस्तरोन्नति भइरहेको नागढुंगा मलेखु सडक खण्ड आज र भोली (शुक्रबार र शनिबार)का लागि खुल्ला गरिएको छ ।
भक्तपुरको सल्लाघारीमा हुन लागेको नेकपा एमालेको ११औं केन्द्रीय महाधिवेशन उद्घाटन कार्यक्रमलाई मध्यनजर नागढुंगा–मुग्लिन सडक आयोजनाले मंसिर २४ गतेबाट आंशिक बन्द गरेर काम गरिरहेको भएपनि दुई दिनका लागि बन्द नगर्ने भएको हो । त्यसपछि भने कार्यतालिकाअनुसार तोकिएको समयमा सडक बन्द गरेर काम गरिने नागढुंगा–मुग्लिन सडक योजना पूर्वी खण्डका प्रमुख केशवप्रसाद ओझाले जानकारी दिए ।
‘स्तरोन्नतिको कामलाई तिब्रता दिन धादिङ र काठमाडौंको जिल्ला प्रशासन कार्यालयसँग समन्वय गरेर मंसिर २४ गतेबाट पुस १ गतेसम्म बिहान १०ः३० देखि दिउसो ३ः३० सम्म दैनिक पाँच घन्टा बन्द गरेर काम गरिरहेका थियाौं, एमालेको महाधिवेशनमा नेता, कार्यकर्ता र महाधिवेशन प्रतिनिधिहरुको चहलपहल बढ्ने भएकोले सवारी चाप र संभावित सडक जामलाई मध्यनजर गरी सडक बन्द नगर्ने निर्णय लिएका छौं’, ओझाले भने ।
एमाले निकट युवा संघको टोलीले बुधबार भौतिक पूर्वाधार तथा यातायातमन्त्री कुलमान घिसिङलाई भेटेर महाधिवेशनका लागि दुई दिन सडक खुला गरिदिन आग्रह गरेका थिए । नागढुंगा–मुग्लिन सडक योजना कार्यालयले पूर्वनिर्धारित तालिकाअनुसार सडक बन्द गरेर काम गर्न लाग्दै गर्दा एमाले नेताहरुले आलोचना गरेका थिए ।
सडक विभागले काठमाडौं जिल्लाभित्र पर्ने नागढुंगा–पिप्लामोड खण्डको कालोपत्र गर्ने कार्यलाई उच्च प्राथमिकतामा राखेर काम गरिरहेको छ भने धादिङ जिल्लाभित्र पर्ने नौबिसे–मलेखु खण्डको बाँङ्गेभीरमा सडक चौडा गर्ने कामलाई महत्व दिएर काम अघि बढाएको छ ।
