धादिङ । धादिङ अस्पतालमा कार्यरत स्वास्थ्य शिक्षाविद् डा. त्रिभुवन चन्द्र झाले ‘गुडबाइ सुगर एडिक्शन: फ्री योर माइन्ड, हिल योर बडी’ पुस्तक लोकार्पण गर्नुभएको छ ।
चिनीको अत्यधिक सेवनले बढ्दै गएको मधुमेह, मोटोपन र मुटुरोगजस्ता दीर्घरोगप्रति जनचेतना अभिवृद्धि गर्ने उद्देश्यसहित लेखिएको पुस्तकको शुक्रबार बागमती प्रदेश स्वास्थ्य मन्त्री किरण थापा मगरमार्फत लोकार्पण गरिएको हो ।
लोकार्पित पुस्तकमा चिनीप्रतिको लत कसरी विकास हुन्छ र त्यसले शारीरिक तथा मानसिक स्वास्थ्यमा पार्ने दीर्घकालीन असरबारे वैज्ञानिक आधारसहित व्याख्या गरिएको छ । चिनीको अत्यधिक सेवनले मधुमेह, मोटोपन, मुटुसम्बन्धी समस्या जस्ता रोग निम्त्याउने जोखिमबारे पनि पुस्तकमा उल्लेख गरिएको छ ।
‘चिनी परित्याग वा न्यूनिकरण गर्दा ऊर्जा बढ्ने, निद्रा सुधार हुने, छाला स्वस्थ हुने र समग्र जीवनशैलीमा सकारात्मक परिवर्तन आउनेछ । पुस्तकमा चिनीको सेवन घटाउँदै स्वस्थ जीवनशैली अपनाउन व्यवहारिक उपायहरू प्रस्तुत गरिएको छ’, डा.झाले भन्नुभयो ।
१८ वर्षभन्दा बढी समयदेखि क्लिनिकल सेवा र मेडिकल शिक्षामा सक्रिय डा. झा जनरल प्राक्टिस तथा आपतकालीन चिकित्सा (जीपीईएम) का विशेषज्ञ हुनुहुन्छ । यसअघि डा. झाले आपतकालीन सेवामा कार्यरत चिकित्सक, नर्स र प्यारामेडिक्सका लागि उपयोगी ‘अल्टिमेट इमर्जेन्सी मेडिसिन’ पुस्तक लेख्नुभएको छ ।
