धादिङ । धादिङ जिल्लाको आर्थिक, सांस्कृतिक तथा पर्यटन प्रवर्द्धन गर्ने उद्देश्यसहित सुरु भएको दशौं धादिङ महोत्सवमा आज माघ १६ गते राष्ट्रियस्तरका कलाकारहरूको विशेष सांगीतिक तथा सांस्कृतिक प्रस्तुति रहनेछ।
आजको कार्यक्रममा लोकदोहोरी, आधुनिक गीत, नृत्य तथा मनोरञ्जनात्मक प्रस्तुति समावेश गरिनेछ । जसले दर्शकलाई आकर्षित गर्ने अपेक्षा गरिएको छ। आज थानेश्वर गौतम, सागर बिसी, कमला घिमिरे, मधु रसाइली, हरि सुनारलगायतको प्रस्तुति रहनेछ ।
धादिङबेसीस्थित खुला मञ्चमा जारी महोत्सवमा सांस्कृतिक कार्यक्रमसँगै कृषि, उद्योग, पर्यटन तथा स्थानीय उत्पादनको प्रदर्शनी पनि निरन्तर सञ्चालन भइरहेको छ।
महोत्सवले स्थानीय व्यवसायलाई चलायमान बनाउनुका साथै जिल्लाको पर्यटन प्रवर्द्धनमा टेवा पुर्याइरहेको व्यवसायी तथा दर्शकहरूले बताएका छन्। कार्यक्रम माघ २५ गतेसम्म सञ्चालन हुने धादिङ उद्योग वाणिज्य संघले जनाएको छ।
