धादिङ : नेपाली काँग्रेसको राजनीतिमा बौद्धिक, प्रष्ट र जुझारु छवि बनाएका युवा नेता कृष्ण रिजाल यतिबेला धादिङ क्षेत्र नम्बर १ मा चर्चाको केन्द्रमा छन् । हालसम्म काँग्रेसले विजय हाँसिल गर्न नसकेको यो क्षेत्रमा गगन थापा संगै विद्यार्थी राजनितिमा उदाएका युवा नेता रिजालको उम्मेद्वारीले काँग्रेसजनको मनोवल ह््वात्तै बढाएको छ ।
आगामी फागुन २१ मा हुने प्रतिनिधि सभा निर्वाचनका लागि नेपाली कांग्रेसबाट प्रत्यक्ष तर्फका प्रत्याशी रहेका रिजाल, विद्यार्थी राजनीतिदेखि केन्द्रीय तहको नीति निर्माणसम्मको अनुभव सँगालेका एक शालिन व्यक्तित्व हुन् । वि.सं. २०३९ सालमा धादिङको थाँक्रे गाउँपालिका वडा नम्बर २ मा जन्मिएका रिजालले आफ्नो प्रारम्भिक शिक्षा गाउँबाटै सुरु गरे पनि उच्च शिक्षाका लागि उनी राजधानी छिरेका थिए । उनले दर्शनशास्त्र, समाजशास्त्र, राजनीतिशास्त्र र कानुन जस्ता गहन विषयमा विशेष रुचि राख्दै स्नातकोत्तर तहसम्मको अध्ययन पूरा गरेका छन् ।
रिजालको राजनीतिक यात्रा वि.सं. २०५२ सालमा संस्कृत माध्यमिक विद्यालयको नेपाल विद्यार्थी संघ (नेविसंघ) सचिवबाट सुरु भएको हो । झण्डै तीन दशक लामो राजनीतिक यात्रामा उनले थुप्रै उतारचढाव भोगेका छन् ।
वि.सं. २०५९ मा नेविसंघको जिल्ला उपाध्यक्ष र २०६० सालमा काठमाडौंको प्रतिष्ठित बाल्मीकि क्याम्पसको स्ववियु सचिव बनेर उनले विद्यार्थी आन्दोलनको सफल नेतृत्व गरे । रिजालले २०६७ सालमा तत्कालिन नेपाली कांग्रेसको क्षेत्र नं ३ को क्षेत्रीय सचिव र २०७२ सालमा क्षेत्रीय सभापतिको जिम्मेवारी सम्हाल्दै धादिङमा कांग्रेसको संगठन सुदृढीकरणमा महत्वपूर्ण भूमिका निर्वाह गरेका थिए ।
२०७८ सालमा महाधिवेशन प्रतिनिधि र २०८० सालमा महासमिति सदस्य चुनिएका रिजाल हाल नेपाल तरुण दलको केन्द्रीय सदस्यको रूपमा युवाहरूलाई संगठित गरिरहेका छन् ।
कृष्ण रिजाल केवल चुनावी मैदानका खेलाडी मात्र होइनन्, उनी एक बौद्धिक विश्लेषक पनि हुन् । उनले ‘विचार विशेष’ पत्रिकाको कार्यकारी सम्पादकका रूपमा काम गर्दै नेपाली कांग्रेसका ऐतिहासिक दस्तावेजहरूको संकलनमा ठूलो योगदान दिएका छन् ।
विगतमा १० वर्षसम्म प्राध्यापन पेशामा संलग्न रहेका रिजालले सामाजिक र राजनीतिक अनुसन्धानका क्षेत्रमा समेत आफ्नो दक्षता प्रदर्शन गरेका छन् । उनलाई नजिकबाट चिन्नेहरू उनलाई “निडर र प्रष्ट वक्ता“ का रूपमा व्याख्या गर्छन्, जो तर्क र तथ्यका आधारमा आफ्ना कुरा राख्न माहिर छन् ।
हुन त रिजाल पहिलो पटक प्रतिनिधि सभाको प्रत्यक्ष प्रत्याशी बनेका हुन्, तर चुनावी व्यवस्थापनमा उनी निकै अनुभवी मानिन्छन् । वि.सं. २०७० पछिका सबै स्थानीय र संसदीय निर्वाचनहरूमा उनले धादिङमा निर्वाचन परिचालनको मुख्य जिम्मेवारी सफलतापूर्वक निर्वाह गरिसकेका छन् । संगठनभित्रको आन्तरिक व्यवस्थापन र विपक्षीसँगको राजनीतिक प्रतिस्पर्धामा उनी चतुर रणनीतिकार मानिन्छन् ।
धादिङ क्षेत्र नम्बर १ को भूगोल, जनजीवन र विकासका आवश्यकतालाई सूक्ष्म रूपले बुझेका रिजालले यस पटक ‘नीति निर्माणमा युवाको हस्तक्षेप र क्षेत्रको विकास’ लाई मुख्य एजेन्डा बनाएका छन् । उनी भन्छन्, ‘राजनीति केवल सत्ता प्राप्तिको माध्यम होइन, यो त समाज रूपान्तरणको दर्शन र सेवाको मार्ग हो ।’विगतको कम्युनिष्टको गढको रुपमा परिचित धादिङ क्षेत्र नं १ मा नेपाली काँग्रेसको उदय गराउने सक्ने नेताको रुपमा रिजाललाई हेरिएको छ ।
