धादिङ : नेकपा (एमाले) ले आगामी २०८२ को प्रतिनिधि सभा निर्वाचनका लागि धादिङ क्षेत्र नम्बर १ मा पुनः एक पटक आफ्ना अनुभवी र प्रभावशाली नेता भुमि प्रसाद त्रिपाठीलाई चुनावी मैदानमा उतारेको छ । विद्यार्थी राजनीतिबाट खारिएर आएका त्रिपाठी धादिङ एमालमा लामो समय नेतृत्वमा रहेको ब्यक्ति हुन् ।
वि.सं. २०२२ सालमा धादिङको बेनिघाट रोराङ गाउँपालिका (साबिकको बेनिघाट गाविस) मा जन्मिएका त्रिपाठीको राजनीतिक यात्रा २०३६ सालको जनमत संग्रहताकाबाट सुरु भएको हो । आदर्श माध्यमिक विद्यालय, गजुरीमा अनेरास्ववियुको प्रारम्भिक कमिटी सदस्य बनेर राजनीतिमा होमिएका उनी २०४९ सालमा काठमाडौंको प्रतिष्ठित नेपाल ल क्याम्पसको स्ववियु सचिव निर्वाचित भएपछि राष्ट्रिय राजनीतिको केन्द्रमा देखिएका थिए ।
त्रिपाठीले पार्टी संगठनमा करिब साढे चार दशक लामो समय व्यतित गरिसकेका छन् । २०५५ सालमा एमाले धादिङ–काठमाडौं सम्पर्क मञ्चको अध्यक्ष र जिल्ला कमिटी सदस्य बनेका त्रिपाठी अध्ययन सकेर जिल्ला फर्केपछि पनि पार्टीकै राजनितिमा संगठित भए ।
२०६६ देखि २०७१ सम्म एमाले धादिङको सचिव, उपाध्यक्ष हुँदै २०७१ सालमा जिल्ला अध्यक्षको जिम्मेवारी सम्हालेका त्रिपाठीले झण्डै १२ वर्ष धादिङमा एमालेको नेतृत्व सम्हालेर जिल्लामा पार्टीलाई मजबुत बनाउन सफल भए ।
हाल उनी नेकपा (एमाले) को केन्द्रीय सदस्य तथा धादिङ जिल्ला इन्चार्जको भुमिकामा रहेका छन् । त्रिपाठीको संसदीय चुनावी यात्रा उतार चढावपूर्ण तर उत्साहजनक रहेको छ । संघिय संरचनामा देश गएपछि २०७४ सालको पहिलो आमनिर्वाचनमा तत्कालीन वाम गठबन्धनका तर्फबाट त्रिपाठीले भारी मतसहित चुनाव जितेका थिए । उनले ४९ हजार १ सय २१ मत प्राप्त गर्दा उनका निकटतम प्रतिद्वन्द्वी नेपाली कांग्रेसका विश्वनाथ रिमालले २१ हजार ७ सय ७१ मत मात्र पाएका थिए । झण्डै २७ हजारको मतान्तरले विजयी भएर उनले आफ्नो पकड प्रमाणित गरेका थिए ।
पछिल्लो २०७९ को निर्वाचनमा भने उनी तत्कालिन सत्तारुढ गठबन्धनका साझा उम्मेदवार राजेन्द्र प्रसाद पाण्डेसँग पराजित भए । सो निर्वाचनमा पाण्डेले ३६ हजार १८ मत ल्याएर विजयी हुँदा त्रिपाठीले २७ हजार ९ सय ९७ मत मात्रै प्राप्त गरेका थिए ।
कानुन र राजनीतिशास्त्र दुवैमा दखल राख्ने त्रिपाठी एक बौद्धिक नेता मानिन्छन् । उनले त्रिभुवन विश्वविद्यालयबाट कानुनमा स्नातक र राजनीतिशास्त्रमा स्नातकोत्तर गरेका छन् । राजनीतिमा आउनुअघि र राजनीतिको क्रममा पनि उनी कानुन व्यवसायी (अधिवक्ता) का रूपमा सक्रिय रहे, जसले उनलाई नीति निर्माण र कानुनी जटिलता बुझ्न सहयोग पु¥याएको छ । विगतको संसदीय अनुभव र जिल्लाको भूगोलसँगको गहिरो साक्षात्कारका कारण २०८२ को निर्वाचनमा त्रिपाठीलाई एमालेको बलियो खम्बाको रूपमा हेरिएको छ ।गंगादत्त र दुर्गादेवी त्रिपाठीका सुपुत्र भुमि प्रसाद त्रिपाठीको परिवारमा पत्नी कल्पना उप्रेती (त्रिपाठी), एक छोरा र एक छोरी छन् ।
