धादिङ । धादिङको ज्वालामुखी गाउँपालिकालाई नेपालकै पहिलो सफा तथा स्वच्छ गाउँपालिका घोषणा गरिएको छ ।
नेपालको संविधान २०७२ ले निर्दिष्ट गरेको मौलिक हक र सरसफाइ सम्बन्धी रणनीतिक योजनाहरू कार्यान्वयन गर्दै ज्वालामुखी गाउँपालिकाले सफा तथा स्वच्छ गाउँपालिका घोषणा गरेको हो । आइतबार ज्वालामुखी गाउँपालिका–४ ढोलामा विशेष कार्यक्रमसहित प्रतिनिधिसभाका सभामुख डोलप्रसाद अर्यालले ज्वालामुखी नेपालकै पहिलो सफा तथा स्वच्छ गाउँपालिका बनेको घोषणा गर्नुभयो ।
घोषणासभालाई सम्बोधन गर्नुहुँदै सभामुख अर्यालले सरसफाइ र स्वच्छता सम्बन्धी समुदायको सोचमा सकारात्मक परिवर्तन ल्याई सफा तथा स्वच्छ गाउँ अभियानलाई पूर्ण सार्थकता दिन सफल भएकोमा प्रशंसा गर्नुभयो । कार्यक्रम उद्घाटनमा मौलिक परम्परा अनुसार करुवाबाट पानी पिएर कार्यक्रमको शुभारम्भ गर्नुभएको थियो ।
गाउँपालिकाका प्रत्येक घरधुरीमा सरसफाइ सुविधा, सुरक्षित खानेपानीको पहुँच र व्यक्तिगत स्वच्छता अभ्यासको पूर्ण पालना गराई सफा तथा स्वच्छ गाउँपालिका घोषणा गरिएको गाउँपालिकाका अध्यक्ष यमनाथ दनैले बताउनुभयो ।
“हाम्रो लक्ष्य तथ्याङ्कमा मात्र होइन, नागरिकको दैनिक जीवन र व्यवहारमै सरसफाइको संस्कृति बसाल्नु हो । सफा र स्वच्छ ज्वालामुखीको संकल्प पूरा गर्न हामीले वडास्तरबाटै सूचकहरू पूरा गरेर आएका छौं”, अध्यक्ष दनैले भन्नुभयो– “यो अभियानमा हरेक घरधुरीको सक्रिय सहभागिता र प्रतिबद्धता आवश्यक छ । हामी सुरक्षित खानेपानी र पूर्ण सरसफाइको अधिकारलाई घर–घरमा सुनिश्चित गर्न कटिबद्ध छौँ ।”
ज्वालामुखी गाउँपालिकामा छ हजार ७९ घरधुरी छ । त्यसमध्ये पाँच हजार चार सय ३३ घरधुरी आवासको रुपमा प्रयोग भइरहेको छ । सबै घरधुरीमा सुरक्षित पानी, शौचालय, चुलोको प्रयोग भएको छ ।
