धादिङ । धादिङ जिल्लामा करिब १ अर्ब ५० करोड रुपैयाँको लागतमा निर्माणाधीन ‘फ्रेन्च फ्राइ’ उद्योगको स्थलगत अवलोकन गरिएको छ ।

प्रतिनिधिसभाका सभामुख डोल प्रसाद अर्यालले निर्माणाधीन उद्योगको स्थलगत अवलोकन गर्दै यसको प्रगति र भावी योजनाबारे जानकारी लिनुभएको हो । अवलोकनपश्चात् सभामुख अर्यालले युवाहरूको सक्रियतामा सञ्चालित यस्ता उद्योगहरूले राष्ट्रिय अर्थतन्त्रलाई सुदृढ बनाउन महत्वपूर्ण भूमिका खेल्ने उल्लेख गर्नुभयो ।

निजी क्षेत्रको लगानीलाई सुरक्षित र मर्यादित बनाउन राज्यले थप लगानीमैत्री वातावरण निर्माण गर्नुपर्नेमा जोड दिँदै यस्ता उद्यमलाई नेपाल सरकारका तर्फबाट आवश्यक सहयोग, सहजीकरण र प्रोत्साहन उपलब्ध गराउने प्रतिबद्धता समेत व्यक्त गर्नुभयो ।

अवलोकनको क्रममा धादिङ क्षेत्र नम्बर २ बाट नवनिर्वाचित सांसद बोधनारायण श्रेष्ठले पनि युवा व्यवसायीहरूको आँट र लगानीको प्रशंसा गर्नुभयो । उहाँले यस्ता उद्योगको स्थापनाले स्थानीय स्तरमा रोजगारी सिर्जना हुनुका साथै उत्पादन वृद्धि र आर्थिक आत्मनिर्भरता अभिवृद्धिमा टेवा पुग्ने विश्वास व्यक्त गर्नुभयो ।

उद्योगका सञ्चालक रमेश भाई अधिकारीले निर्माणाधीन आयोजनाको वर्तमान अवस्था र आगामी लक्ष्यबारे जानकारी गराउनुभएको थियो । नेपालमा लगानीकर्ताहरूले भोगिरहेका विभिन्न नीतिगत र व्यवहारिक चुनौतीहरूका बारेमा अधिकारीले सरकारको ध्यान आकृष्ट गराउनुभयो ।

उद्योग सञ्चालनमा आएपछि स्थानीय कृषिजन्य कच्चा पदार्थको खपत बढ्ने र जिल्लाको आर्थिक गतिविधिमासुधार आउने अपेक्षा गरिएको छ । श्री कला एग्रो बेस इण्डष्ट्रिज प्रा.लि. द्वारा नीलकण्ठ नगरपालिका–८ मा सञ्चालित उद्योगलाई जिल्लाको महत्वपूर्ण औद्योगिक पहलका रूपमा लिइएको छ ।