धादिङ । रोटरी क्लब अफ स्वयम्भूले धादिङको नीलकण्ठ नगरपालिका–८ स्थित स्वाबलम्बी बहिरा आधारभूत विद्यालयलाई खाद्यान्न सामग्री सहयोग गरेको छ ।
क्लबले आफ्नो सामाजिक उत्तरदायित्व अन्तर्गत विद्यालयमा अध्ययनरत बालबालिकाहरूका लागि करिब ५१ हजार रुपैयाँ बराबरको खाद्यान्न तथा खाध्य सामाग्री हस्तान्तरण गरेको हो।
क्लबका वर्ष २०२५/२६ का अध्यक्ष विनोद बाबु वाग्ले र निवर्तमान अध्यक्ष नरेन्द्र छत्कुली सहितको टोलीले विद्यालयमै पुगेर चामल, तेल, तरकारी लगायतका दैनिक उपभोग्य वस्तुहरू विद्यालयका प्रधानाध्यापक राम प्रसाद अधिकारी तथा विद्यालय परिवारलाई हस्तान्तरण गर्नुभएको थियो । हाल यस विद्यालयमा ४५ जना बालबालिकाहरू अध्ययनरत छन्, जसको दैनिक खाद्यान्न व्यवस्थापनमा यो सहयोगले महत्त्वपूर्ण टेवा पुग्ने विश्वास लिइएको छ ।
सामाग्री हस्तान्तरण कार्यक्रममा बोल्दै अध्यक्ष विनोद बाबु वाग्लेले मानवीय आवश्यकता र सामाजिक सेवाको पवित्र भावनाका साथ यो कार्य गरिएको बताउनुभयो । रोटरी क्लब अफ स्वयम्भूले विगत लामो समयदेखि गोरखा र धादिङ जिल्लाका विभिन्न दुर्गम तथा विपन्न क्षेत्रहरूमा पुगेर स्वास्थ्य र शिक्षा लगायतका क्षेत्रमा सामाजिक कार्यहरू गर्दै आएको छ । आगामी दिनहरूमा पनि यस्ता मानवीय सेवाका कार्यलाई निरन्तरता दिने प्रतिबद्धता क्लबले व्यक्त गरेको छ ।
