धादिङ । नृसिंहधाममा सुरु भएको एक महिने पुरुषोत्तम महोत्सव अवलोकनमा जाने भक्तजनहरुलाई मध्यनजर गर्दै धादिङ मण्डली यातायात प्रा.लि.र ग्रामिण यातायात प्रा.लि.ले छुट्टै बस सेवा संचालनमा ल्याएको छ ।

विशेषगरी काठमाण्डौबाट धादिङको त्रिपुरासुन्दरी गाउँपालिका–१, सल्यानटारस्थित नृर्सिहधामसम्म पुग्ने भक्तालुहरुलाई सहजताको लागि दैनिक एउटा बस छुट्टै संचालनमा ल्याएको हो ।

काठमाडौबाट हरेक दिन विहान ९ः३० बजे काठमाण्डौको गोंगबु नयाँ बसपार्कबाट बस छुट्ने समय तोकेको छ । बसले सिधै नृर्सिहधामसम्म पु¥याउनेछ । नृसिंहधामबाट अपह्रान्न ४ः३० बजे छुट्नेछ । व्यवसायीहरुका अनुसार बस चढ्नेहरुले बस भाडा भने तिर्नुपर्नेछ ।

नृसिंहधाममा जेठ १ गतेदेखि एक महिने पुरुषोत्तम महामहोत्सव सुरु भएको छ । महोत्सवमा देशका विभिन्न भागबाट १५ लाख श्रद्धालुहरु सहभागी हुने अपेक्षा गरिएको छ ।