धादिङ । धादिङबाट प्रतिनिधित्व गरेकी प्रतिनिधिसभा सदस्य गंगादेवी श्रेष्ठले संसदमा सरकारको राष्ट्रियता, परराष्ट्र नीति र सुशासनको नारामाथि तीव्र असन्तुष्टि जनाएकी छन् ।
आज बसेको प्रतिनिधिसभा बैठकको विशेष समयमा बोल्दै सांसद श्रेष्ठले वर्तमान सरकारको कार्यशैलीमाथि प्रश्नहरूको वर्षा गरेकी हुन् । प्रधानमन्त्रीलाई विगतको प्रसङ्ग स्मरण गराउँदै काठमाडौँ महानगरपालिकामा राखिएको ‘ग्रेटर नेपाल’ को नक्सा अहिले कहाँ हरायो भनी प्रश्न गर्दै भनिन्–‘सम्मानीय प्रधानमन्त्रीज्यू मेयर हुदाँ राखिएको ग्रेटर नेपालको नक्सा अहिले खै ?’
सरकारका समर्थकहरूले सामाजिक सञ्जाल फेसबुकमा बचाउ गर्दैमा जनताले नपत्याउने भन्दै सांसद गंगादेवीले सीमा र राष्ट्रियताका सवालमा अहिलेसम्म के–कस्ता कूटनीतिक पहलहरूबारे सरकारसँग जवाफ माग गरेकी छन् । ‘अहिले लिपुलेकको व्यापारिक मार्गको विषयमा किन चुपचाप हुनुहुन्छ ? समर्थकले फेसबुकमा लेखेको भरमा जनताले पत्याइदिनु पर्ने हो कि कूटनीतिक पहल पनि केहि भएको छ ? मुस्ताङको युरोनियम खानी कसैलाई दिएको भन्ने हल्ला के हो ? आम जनताले थाहा पाउनु प¥यो ? सगरमाथामा विदेशी शेना राख्ने कुरो के हो ? यो जनतालाई सैय हुने छैन’, सांसद श्रेष्ठले प्रश्न गरिन् ।
भ्रष्टाचारको विरोध गरेर उदाएको वर्तमान सरकारका मन्त्रीहरू नै अचेल अस्वाभाविक सम्पत्ति र सुनका कारण विवादमा तानिएकोप्रति प्रश्न उठाउँदै सांसद श्रेष्ठले भनिन्–‘सरकारमको मन्त्रीहरुको त्यत्रो धेरै सुन कहाँबाट आयो ? बिल पनि सार्वजानिक गरियोस् ? बिल बिना किनबेच हुदैन ? सुशासन र पारदर्शिता आफैबाट सुरु गर्न सक्नुहोस् ?’
