धादिङ । धादिङको त्रिपुरासुन्दरी गाउँपालिका–१, नृसिंहधाममा सुरु भएको पुरुषोत्तम महामहोत्सव दुई दिनमा चार लाख भक्तजनले दर्शन गरेका छन् ।
शनिबार करिब दुई लाख ५० हजार र आइतबार एक लाख ५० हजार भक्तजनले नृसिंहधामको दर्शन गरेका हुन् ।
विशेषगरी काठमाडौँ, पोखरा, चितवन, गोरखा लगायतका जिल्लाहरुबाट भक्तजनको उपस्थिति बढिरहेको श्रीवास कृष्ण दास ब्रम्हचार्यले जानकारी दिनुभयो ।
नृसिंहधाम पुगेर भक्तजनहरुले बुढीगण्डकी र नेत्रवाती नदीको संगमस्थलमा स्नान गर्ने, पुजापाठ गर्ने र गोत्राअनुसार कुण्डमा छुट्टाछुटै हवन गर्ने गर्दछन् । श्रदालुहरुले आफ्नो पितृहरुको सम्झनामा दीपदान र हवन कार्य गरिरहेको छन् ।
महामहोत्सवमा भक्तजनहरुको भीड अत्याधिक बढिरहेकोले आयोजकलाई व्यवस्थापनमा समेत हम्मेहम्मे पर्ने गरेको छ । अन्य दिनमा भन्दा विदाको दिनमा भक्तजनको उपस्थिति अत्याधिक बढेपछि आयोजकले विभिन्न निकायहरुसंग सहयोग मागेर व्यवस्थापनलाई चुस्त बनाइरहेको छ ।
धामको दर्शनमा निस्कदा खानेकुराको वैकल्पिक व्यवस्था गर्न र सुरक्षाको दृष्टीबाट सहज रहन आग्रह पनि गरिरहेको छ ।
पुरुषोत्तम महिनाको यो समयमा दान र पूजा गर्दा पुण्य मिल्ने विश्वास गरिन्छ । वैदिक सनातन शास्त्र अनुसार भगवान नृसिंहदेवको १२ प्रमुख पीठमध्ये नृसिंहधाम एक मानिन्छ । नेपालमै एक मात्र नृसिंहपीठका रुपमा चिनिने यस धाम केही वर्षदेखि देशविदेशमा चर्चामा छ ।
