धादिङ । यदि तपाईं प्राकृतिक सुन्दरता र ऐतिहासिक ठाउँको खोजीमा हुनुहुन्छ भने धादिङको भैरवी मन्दिर एक पटक पुग्नै पर्ने पर्यटकीय स्थल हो । नीलकण्ठ नगरपालिका–६ मा रहेको यो मन्दिर विदाको समयमा घुम्न जाने सबैभन्दा उत्कृष्ट र नजिकको गन्तव्य बनेको छ । पहाडको अग्लो चुचुरोमा रहेको यो ठाउँबाट गणेश, मनास्लु र मानापाथी हिमाल आँखै अगाडि स्पष्ट देखिन्छन् । यही मनमोहक दृश्य र शीतल वातावरणका कारण भैरबी मन्दिर घुम्नै पर्ने सुन्दर स्थल बनेको हो ।

विशेषगरी युवापुस्ताका लागि फोटो र भिडियो खिच्ने सबैभन्दा आकर्षक केन्द्र हो । पृष्ठभूमीमा देखिने सुन्दर दृश्यलाई क्यामेरामा कैद गर्न र सामाजिक सञ्जालका लागि रिल्स तथा टिकटक बनाउन युवायुवतीको भीड नै लाग्ने गरेको छ । विद्यार्थीहरूका लागि यो ठाउँ प्राकृतिक सौन्दर्य नियाल्ने र ऐतिहासिक कुराहरू सिक्ने सबैभन्दा नजिकको शैक्षिक भ्रमण स्थल पनि हो । धादिङको पुरानो सदरमुकाम सुनौलाबजार नजिकै रहेकाले मन्दिरमा अचेल पदयात्रा र हाइकिङ गर्नेहरू पनि उत्तिकै आउने गर्छन् ।

भैरबी मन्दिर प्राकृतिक रूपमा जति सुन्दर छ, यसको इतिहास पनि उति नै रोचक छ । राजा राम शाहले विसं १६६६ मा स्थापना गरेको यो ऐतिहासिक शक्तिपीठमा राष्ट्र एकीकरणका क्रममा पृथ्वीनारायण शाहले समेत बास बसेर भाकल गरेको किम्वदन्ती छ । यहाँ बडादसैँ र चैते दसैँमा ठूलो मेला लाग्छ र बडादसैँको नवमीमा सुङ्गुुरको बलि दिने अनौठो परम्परा छ । यो ऐतिहासिक महत्व बुझ्न र दर्शन गर्न नेपालका विभिन्न जिल्ला तथा छिमेकी देश भारतबाट समेत पर्यटकहरू यहाँ आउने भैरवी मन्दिरमा गुठी व्यवस्थापन समितिका सचिव कृष्ण बहादुर श्रेष्ठले बताए ।

भूकम्पपछि अहिले यो मन्दिरलाई पुननिर्माण गरी भव्य बनाइएको छ । पर्यटकहरूको सुविधाका लागि मन्दिर परिसरमा खानेपानी, आधुनिक शौचालय, इन्टरनेट र सिसी क्यामेराको व्यवस्था गरिएको छ । सदरमुकाम धादिङबेसीबाट १८ किलोमिटरको सहज यात्रामा यहाँ पुग्न सकिन्छ । सुन्दर हिमाल हेर्न, ऐतिहासिक कुराहरू बुझ्न र विदाको दिन रमाइलो गर्न यो मन्दिर धादिङबेसीबाट नजिक रहेको सबैभन्दा उत्तम पर्यटकीय गन्तव्य हो ।

फोटो खिच्न र भिडियो बनाउन विभिन्न आकर्षक संरचनाहरु निर्माण गरिएको छ । धादिङको पर्यटन प्रवद्र्वनमा पनि भैरवी मन्दिरको महत्वपूर्ण भूमिका खलेको छ । विभिन्न सांस्कृतिक कार्यक्रम तथा धादिङ महोत्सवमा समेत यस मन्दिरको प्रचारप्रसार गरिदै आएको छ ।