धादिङ। विभिन्न पोसाकमा सजिएका सयौँ बालबालिकाहरू । कसैको हातमा आफैँले बनाएका विज्ञानका सामाग्री थिए । कोही मञ्चमा सानदार नृत्य देखाउँदै थिए । कोहीले मञ्चमा उभिएर निर्धक्क आफ्ना विचारहरू राखे । धादिङको थाक्रे गाउँपालिकामा आयोजित ‘प्रथम थाक्रे बाल महोत्सव’ को दृश्य निकै लोभलाग्दो देखिन्थ्यो ।
विद्यार्थीहरूले तयार पारेका विज्ञान प्रदर्शनी महोत्सवको आकर्षण बन्यो । महोत्सवमा सहभागी भएकी जनजागृति माविकी कक्षा १० मा अध्ययनरत प्रतिमा घलानले आफ्नो अनुभव सुनाउँदै भनिन्, “किताबमा पढेका कुरालाई आफैँले बनाएर देखाउन पाउँदा रमाइलो लाग्यो । यसले हाम्रो आँट र आत्मविश्वास धेरै बढाएको छ ।”
“हामीले कक्षाकोठामा पढेको विज्ञानको सिद्धान्तलाई प्रयोग गरेर देखायौँ । साथीहरू र अभिभावकले हाम्रो कामको प्रशंसा गर्दा छुट्टै रमाइलो हुने रहेछ”, विज्ञान प्रदर्शनीदेखि विभिन्न क्रियाकलापमा भाग लिनुभएकी कक्षा ८ मा अध्ययनरत रविना ठकुरीले सी सुनाइन् ।
महोत्सवमा थाक्रे गाउँपालिकाभित्रका कुल ४२ वटा विद्यालयबाट विद्यार्थीहरु सहभागी थिए । विद्यार्थीहरूले सुन्दर शैक्षिक मोडेलहरू आफ्नै हातले बनाएका थिए । स्थानीय अन्नबालीको प्रयोग गरेर नेपालको नक्सामाथि बनाइएको कलात्मक बुट्टा महोत्सवको आकर्षणको केन्द्र बन्यो । विभिन्न जातजातिका पहिचान झल्कने सांस्कृतिक प्रस्तुतिहरूले महोत्सवलाई थप आकर्षक बनाएको अभिभावकहरुले प्रतिकृया दिए । महोत्सवमा उपस्थित अभिभावकहरूले बालबालिकाको क्षमता विकास र सिर्जनशील शिक्षाको लागि बालबालिकालाई यस्ता अवसरहरू निरन्तर दिनुपर्ने बताए ।
बालबालिकाको सोच्ने शैलीलाई नयाँ उचाइ दिन र सिर्जनशीलताको विकास गर्न यो महोत्सवले बलियो जग बसालेको गाउँपालिकाका अध्यक्ष रामकुमार आचार्यले बताउनुभयो । विद्यालयमा मात्र सीमित शिक्षालाई व्यावहारिक रूप दिन महोत्सवले ठुलो मद्दत पु¥याएको र थाक्रेका बालबालिकालाई नयाँ कुरा सिक्ने र सिकाउने राम्रो अवसर मिलेको उहाँको भनाई छ ।
महोत्सवले बालबालिकाको नेतृत्व लिन सक्ने आँट र व्यावहारिक शिक्षाको प्रवद्र्धनमा सहयोग पुगेको छ । महोत्सवको महत्वबारे प्रस्ट पार्दै जिल्ला समन्वय समिति धादिङका प्रमुख नवराज अधिकारीले भन्नुभयो, “हामी हाम्रा बालबालिकालाई किताबी ज्ञानमा मात्र सीमित राख्न हुँदैन । उनीहरूले समाज र संसारलाई बुझून्, आफ्नो प्रतिभा चिनून् र भोलि समाजको नेतृत्व गर्न सकून् भन्ने नै हाम्रो मुख्य चाहना हुनुपर्छ ।” बाल महोत्सवले बालबालिकाको चौतर्फी विकासका लागि सुनौलो बाटो देखाएको उहाँले बताउनुभयो ।
जेठ १६ र १७ गते दुई दिन संचालन भएको बाल महोत्सवमा उत्कृष्ट प्रदर्शन गर्ने विद्यार्थीहरूलाई पुरस्कृत पनि गरेको छ । विभिन्न विधामा उत्कृष्ट हुने विद्यार्थी र उनीहरू आबद्ध विद्यालयलाई पुरस्कार वितरण गरिएको हो ।
