धादिङ । बागमती प्रदेश सरकारका सामाजिक विकास मन्त्री कन्चन चन्द्र बादेले सामुदायिक विद्यालयहरू देशको पहिचान र गौरव भएको बताउनुभएको छ ।
धादिङबेसीमा रहेको नीलकण्ठ बालमन्दिर माध्यामिक विद्यालयको ५२औं वार्षिकोत्सवलाई सम्बोधन गर्दै मन्त्री बादेले सामुदायिक विद्यालयमा अध्ययन गरेका विद्यार्थीहरू नै आज देशका ठूला र उच्च ओहोदामा पुग्न सफल भएको उल्लेख गर्नुभयो ।
सामुदायिक विद्यालयका विद्यार्थीहरू सक्षम, सबल र अब्बल छन् भन्ने कुरालाई उनीहरूको सफलता र समाजमा पु¥याएको योगदानले नै प्रमाणित गरिसकेको दाबी गर्नुभयो ।
विद्यालयलाई विद्यार्थीको भविष्य निर्माण गर्ने स्थल रहेको भन्दै मन्त्री बादेले विद्यार्थीको लगनशीलता, निरन्तरको परिश्रम र मेहनत नै विद्यालयको वास्तविक गहना भएको बताउनुभयो ।
नीलकण्ठ बालमन्दिर मावि बागमती प्रदेशको उत्कृष्ट सामुदायिक विद्यालयहरूमध्ये एक बन्न सफल भएको र एसओएस सर्टिफाइड विद्यालयको रूपमा स्थापित भएकोमा विद्यालयको प्रशंसा समेत गर्नुभयो । शिक्षकहरूको अहोरात्रको मेहनत र लगावकै कारण विद्यार्थीहरूको पठनसीप विकास उत्कृष्ट र अब्बल बन्न सकेको भन्दै उहाँले शिक्षकहरूको योगदानको कदरयोग्य रहेको बताउनुभयो ।
सामुदायिक विद्यालयहरूको शैक्षिक गुणस्तर र समग्र सुधारका लागि प्रदेश सरकार सदैव प्रतिबद्ध रहेको स्पष्ट पार्नुभयो । विद्यालयहरूमा दरबन्दी मिलान, भौतिक पूर्वाधारको विकास तथा अध्यापन गराउने शिक्षकहरूका समसामयिक विषय र समस्याहरूलाई मन्त्रालयले नजिकबाट नियालिरहेको र सोही अनुरूप योजनाबद्ध ढंगले काम अगाडि बढाइरहेको उहाँको भनाइ थियो ।
