धादिङ । नेपाल पत्रकार महासंघ जिल्ला शाखा धादिङले संस्थापक पदाधिकारी तथा सदस्यहरुलाई सम्मान गरेको छ ।
महासंघले आफ्नो २४औं साधारणसभाको अवसरमा संस्थापक उपसभापति बासु तिमल्सिना, कोषाध्यक्ष लक्ष्मी कट्टेल, सदस्यहरु मोहन कुमार श्रेष्ठ, नबिनबन्धु पहाडी र उत्तम कँडेललाई सम्मान गरेको हो ।
जिल्लामा व्यावसायिक पत्रकारिताको जग बसाल्न र श्रमजीवी पत्रकारहरूको हकहितका लागि सुरुवाती दिनमा संघर्ष गर्ने अग्रजहरूको योगदानलाई कदर गर्दै सम्मान गरिएको महासंघ धादिङका अध्यक्ष सीताराम अधिकारीले बताउनुभयो ।
विगतमा अग्रजहरूले गरेको त्याग र समर्पणको संस्मरण गर्दै पुराना पुस्ताको अनुभव र योगदानलाई सम्मान गर्दा नयाँ पुस्तामा आफ्नो पेसा र संस्थाप्रति थप गौरवबोध हुने विश्वास व्यक्त गर्नुभयो ।
सम्मानित हुनुभएका संस्थापक उपसभापति बासु तिमल्सिनाले विगतका कठिन दिनहरूमा स्रोत र साधनको अभावका बीच पनि जिल्लामा पत्रकारिताको जग बसाल्न आफूहरूले गरेको संघर्षको स्मरण गर्नुभयो ।
संस्थाले आफ्नो विगतलाई नबिर्सीकन पुराना सहयात्रीहरूलाई सम्झिएकोमा आभार प्रकट गर्नुभयो । सम्मानले आफूलाई अझै पनि समाज र पत्रकारिता क्षेत्रप्रति जिम्मेवार रहेको महसुस गराएको उहाँको भनाई थियो । नयाँ पुस्ताका पत्रकारहरूलाई व्यावसायिक मर्यादासहित सत्य र तथ्यको जगमा उभिएर पत्रकारिता गर्न समेत आग्रह गर्नुभयो ।
हेर्नुहोस् तस्बिरहरु
