धादिङ । धादिङको सदरमुकाम धादिङबेसीका मासु तथा माछा पसलहरूको आकस्मिक अनुगमन गरिएको छ ।
पशु सेवा कार्यालय धादिङ र नीलकण्ठ नगरपालिकाले संयुक्त अनुगमन गरिएको हो । अनुगमनका क्रममा बजारमा सञ्चालित ३५ वटा मासु तथा माछा पसलको निरीक्षण गरिएको नीलकण्ठ नगरपालिकाका स्वास्थ्य शाखा प्रमुख विष्णु प्रसाद रिजालले जानकारी दिनुभयो ।
उपभोक्ताले खरिद गर्ने मासु तथा माछा ताजा, स्वस्थकर र सुरक्षित गर्ने उद्देश्यले अनुमगन गरिएको हो । स्वास्थ्य शाखा प्रमुख रिजालका अनुसार अनुगमनका क्रममा दर्ता नै नगरी सञ्चालन भएका पसल, मूल्यसूची नराखिएको र मासु काट्ने तथा भण्डारण गर्ने स्थानमा आवश्यक सरसफाइ नगरिएको पसललाई सुधार गर्न निर्देशन दिइएको छ ।
कैफियत भेटिएका पसलहरूलाई एक साताभित्र दर्ता प्रक्रिया पूरा गर्न, मूल्यसूची टाँस्न र सरसफाइमा सुधार गर्न भनिएको उहाँले जानकारी दिनुभयो । तोकिएको समयावधिभित्र पनि सुधार नगरे वा निर्देशनको अवज्ञा गरे कानुनबमोजिम पसल शिल गर्ने तथा जरिवानासहितको कानुनी कारबाही अघि बढाइने प्रमुख रिजालले बताउनुभयो ।
विगतका वर्षहरूमा गरिएका बजार अनुगमनका कारण धादिङबेसी क्षेत्रको मासु व्यवसायमा केही सकारात्मक र उत्साहजनक सुधारहरू पनि देखिएका छन् ।
अनुगमन टोलीमा राष्ट्रिय उपभोक्ता मञ्च तथा उपभोक्ता हित संरक्षण मञ्चका प्रतिनिधिहरू, स्थानीय जनप्रतिनिधि र सुरक्षाकर्मीहरूको समेत सहभागि थिए ।
