काठमाडौं । नेपाली कांग्रेसको क्रियाशील सदस्यता अद्यावधिक गर्ने तोकिएको समयसीमा आज सकिँदै छ । धादिङ जिल्लाबाट आज विहानसम्म (समाचार तयार पार्दासम्म) ८ हजार ८ सय ५० जनाको अद्यावधीक भएको छ । अघिल्लो वर्ष १९ हजार ८ सय ३४ क्रियाशील थिए ।
नेपाली कांग्रेस श्रोतका अनुसार यस वर्ष कांग्रेसले स्थायी सरकारी सेवा सुविधा लिनेहरुको अध्यावधिक नगराएकोले संख्या घटेको हो । कांग्रेसले स्थायी शिक्षक र कर्मचारीहरुको क्रियाशील सदस्यता अद्यावधिक गराएको छैन ।
निर्धारित समयावधि जेठ २८ गते राति १२ बजेसम्म रहेको छ । क्रियाशील सदस्यता अद्यावधिक गर्न योग्य कुल ७ लाख ८२ हजार २०९ जना सदस्यमध्ये देशभर हालसम्म ४ लाख ५७ हजार ३६६ जनाले सदस्यता परिचय नम्बर प्राप्त गरिसकेका छन् । त्यस्तै १ लाख २४ हजार ७४८ जनाले स्वयं विवरण भरी अद्यावधिक प्रक्रियामा रहेका छन् ।
सम्बन्धित सबै क्रियाशील सदस्यलाई तोकिएको समयसीमा भित्र आफ्नो सदस्यता अद्यावधिक कार्य सम्पन्न गर्न कांग्रेसले आग्रह गरेको छ ।
आज तोकिएको समयसम्म क्रियाशील सदस्यता अद्यावधिक नगरेमा आगामी महाधिवेशनमा भाग लिन नपाइने काँग्रेसले स्पष्ट गरेको छ ।
