धादिङ । धादिङका पत्रकारहरुले जिल्ला प्रशासन कार्यालय धादिङमा आज पनि धर्ना दिएका छन् ।सरकारी सूचना तथा विज्ञापन नीजि सञ्चार माध्यमले प्रकासन प्रशारण गर्न नपाउने नीति ल्याएसँगै देशभरका पत्रकारहरु आन्दोलनमा उत्रिएका हुन् । पत्रकारहरूले मिडियाविरोधी नीति फिर्ता लिन, प्रेस तथा अभिव्यक्ति स्वतन्त्रताको रक्षा गर्न र नागरिकको सूचनाको अधिकार सुनिश्चित गर्न सरकारसँग माग गरेका छन् ।
नेपाल पत्रकार महासंघले सरकारी विज्ञापन तथा सूचना वितरणसम्बन्धी विभेदकारी र स्वेच्छाचारी निर्णय खारेज गर्न माग गर्दै देशव्यापी धर्ना कार्यक्रम आयोजना गरेको हो ।
पछिल्लो समय सरकारले प्रेस तथा अभिव्यक्ति स्वतन्त्रतामाथि नियन्त्रण बढाउन खोजेकोले आन्दोलनमा उत्रिनु परेको महासंघका अध्यक्ष सीताराम अधिकारीले बताए । संसद बाहिरबाट कार्यदल बनाएर सरकारले संविधानले दिएका सबै प्रेस तथा अभिव्यक्ति स्वतन्त्रतामाथी हस्तक्षेप गर्न खोजेको अधिकारीको आरोप छ ।
सञ्चार माध्यमलाई सूचना र सार्वजनिक विज्ञापनहरू प्रकाशन र प्रसारणमा रोक लगाएर सरकारले मिडियाको मुख थुन्ने प्रयास गरेको पत्रकारहरुको भनाई छ ।
