धादिङ । धादिङको नीलकण्ठ नगरपालिका–३, धादिङबेसीस्थित एमालेचोकमा खानेपानीको पाइपलाइन बिछ्याउन भत्काइएको सडक महिनैदेखि अलपत्र बनेको छ ।
नगर क्षेत्रभित्र खानेपानीको पाइपलाइन विस्तार गर्ने क्रममा भत्काइएको सडक मर्मत नगर्दा स्थानीय बासिन्दा र यात्रुहरू सास्ती व्यहोर्न बाध्य भएका छन् ।
पाइपलाइन बिछ्याउने काम सकिए पनि सडकको मर्मत सम्भार नगरिएका कारण अहिले यस स्थानमा सवारी साधन आवतजावत गर्न कठिन भएको छ । नीलकण्ठ नगरपालिकाले आयोजना गरेको सार्वजनिक सुनुवाइमा नै स्थानीयहरुले सडक मर्मत नभएको र नागरिकले सास्ती भोग्नु परेको कुरा उठाएर तत्काल मर्मत गर्न माग गरेको भएपनि अहिलेसम्म सरोकारवालाको ध्यान पुगेको छैन ।
एमाले चोक नीलकण्ठ नगरपालिकाकै एक प्रमुख र व्यस्त व्यापारिक केन्द्र हो । सडकको यस्ता अवस्थाका कारण विशेषगरी साना सवारी साधनहरू सञ्चालन गर्न सकस भइरहेको छ यसले गर्दा सवारी दुर्घटनाको जोखिम बढिरहेको छ ।
सडक भत्काएर त्यसै छोडिदिँदा सर्वसाधारणको दैनिक जीवन कष्टकर बनेको छ । सडक मर्मत नहुँदा घाम लागेको समयमा धुलो उडेर वरपरका पसल धुलाम्मे हुने, पानी परेको बेला सडक हिलाम्मे हुने गरेको स्थानीय ईश्वरी कोइरालाले बताए ।
हिलो र खाल्डाखुल्डीका कारण पैदलयात्रीहरूलाई बाटो हिँड्न समेत नसकिने अवस्था सिर्जना हुने गरेको छ । विकासको नाममा खनिएको सडक समयमै पुननिर्माण नगरिँदा एमाले चोक क्षेत्रको व्यापार व्यवसायमा समेत नकारात्मक असर परेको व्यवसायीहरुले गुनासो गरेका छन् ।
