धादिङ । धादिङको गंगाजमुना गाउँपालिका–६ मा रहेको ‘मंसिरे होमस्टे’ पछिल्लो समय पर्यटकको रोजाइमा पर्न थालेको छ । ग्रामीण परिवेश, प्राकृतिक सौन्दर्य र स्थानीय संस्कृतिको अनुभव लिन यहाँ पर्यटकहरु पुग्ने गरेका छन् ।
शान्त वातावरण, हरियाली वनजंगल र पहाडी दृश्यले होमस्टे पुग्ने जोकोहीको मन लोभ्याउने गरेको छ । होमस्टे व्यवस्थापन समितिका अध्यक्ष सतमाया गुरुङ भन्नुहुन्छ,“मंसिरे होमस्टेमा गुरुङ समुदायको मौलिक संस्कृति, परम्परा र रहनसहनको प्रत्यक्ष मजा लिन सक्नुहुन्छ ।”
धादिङको रमणीय पहाडी भूभागमा अवस्थित यस क्षेत्रबाट गाउँको सुन्दर प्राकृतिक दृश्य र स्थानीय संस्कृतिको अवलोकन गर्न सकिन्छ । मंसिरे होमस्टेमा पुग्ने पाहुनाले स्थानीय परम्परागत रहनसहन र ग्रामीण जीवनशैलीलाई नजिकबाट बुझ्न पाउँछन् । “हामी पाहुनालाई आफ्नै परम्परागत शैलीमा आदर–सत्कार गर्छौं । यहाँ आउनेले हाम्रो मौलिक संस्कृति र ग्रामीण परिवेशको छुट्टै आनन्द पाउनुहुन्छ । मंसिरेलाई धादिङकै आकर्षक पर्यटकीय गन्तव्य बनाउन हामी लागिपरेका छौँ”, अध्यक्ष गुरुङले बताउनुहोस् ।
यो होमस्टे सातकन्यादेवी आमा समूहले सञ्चालन गरेको हो । होमस्टे सञ्चालनमा आएपछि मंसिरे गाउँमा आन्तरिक तथा बाह्य पर्यटकहरूको आगमन बढेको छ । होमस्टेमा पुग्ने पर्यटकले स्थानीय अर्गानिक परिकारको स्वाद लिन पाउँनेछन् । ग्रामीण वस्तीको स्वाद र न्यानो आतिथ्यले गर्दा पर्यटकहरु फेरि आउने बाचा गर्दै फर्किने गरेको होमस्टे सञ्चालक राज लामाले बताउनुभयो ।
पाहुनाका लागि कोदोको ढिँडो, कोदोको सेलरोटी, स्थानीय कुखुराको मासु, भटमास र गुन्द्रुकको अचार जस्ता गाउँमै उत्पादित खानपान होमस्टेको विशेषता हो । लामा भन्नुहुन्छ,“यहाँ आउने पाहुनाहरूले स्थानीय उत्पादनबाट तयार पारिएका परिकारको स्वाद लिन र ग्रामीण जीवनशैलीलाई नजिकबाट बुझ्न पाउँनुहुन्छ ।”
होमस्टेका कारण स्थानीय महिलाहरूको आयआर्जनमा समेत वृद्धि भएको छ । पर्यटकलाई गुणस्तरीय सेवा प्रदान गर्दै मंसिरेलाई धादिङकै आकर्षक पर्यटकीय गन्तव्यका रूपमा विकास गर्न यहाँका स्थानीयहरु लागिपरेका छन् ।
यो होमस्टेमा गोरखा, नुवाकोट, काठमाडौँ लगायत विभिन्न स्थानीय तहका पाहुनाहरू र गंगाजमुना दर्शनमा आउनुभएका भक्तजनहरू अवलोकन गर्न तथा शान्त वातावरणमा रमाउन आउने गर्छन् । कोदोको ढिँडो, कोदोको सेलरोटी, भटमास र गुन्द्रुकको अचार, रैथाने कुखुराको मासु र गाउँमै उत्पादन गरिएका खानाको स्वाद लिन मानिसहरु यहाँ पुग्ने गरेका छन् । होमस्टेमा पर्यटकहरू प्रति गरिने आदर–सत्कार पाहुनाहरूले राम्रो मान्ने र फेरि पनि अर्गानिक खाना खानका लागि आउनेछौं’ भन्दै खुसी भएर छुटिने गरेको लामाले अनुभव सुनाउनुभयो ।
सडकको पहुँच क्रमशः सुधार हुँदै जाँदा यहाँ पर्यटकको संख्या पनि बढ्दै गएको छ । होमस्टे व्यवस्थापनमा स्थानीय युवा तथा महिलाहरू सक्रिय रूपमा सहभागी भएका छन् । यसले गाउँमै युवा वर्ग र महिलाका लागि रोजगारी सिर्जना गर्न ठुलो मद्दत पुगेको स्थानीयवासीहरू बताउँछन् । होमस्टेमा आउने पाहुनाहरूलाई स्थानीय कला, संस्कृति र परम्परागत रहनसहनका बारेमा समेत जानकारी गराउने गरेको छ ।
ग्रामीण पर्यटनको विकाससँगै मंसिरे होमस्टेका कारण गंगाजमुना गाउँपालिका नै परिचित बन्दै गएको छ । मंसिरे होमस्टेमा एक घरमा पाँच जनाको दरले पाहुना राख्न सकिने व्यवस्थापन मिलाएको छ । हाल स्थानीय सरकार, पर्यटन व्यवसायी र समुदायको सहकार्यमा मंसिरे होमस्टेलाई गाउँपालिकाको प्रमुख पर्यटकीय गन्तव्यका रूपमा विकास गर्ने प्रयास जारी छ ।
