धादिङ । धादिङको नीलकण्ठ नगरपालिका–९, सल्लाघरी पार्कमा आज सरसफाई गरिएको छ । नेपाल तमु गुरुङ विद्यार्थी छोजं धी, जिल्ला कार्य समिति धादिङले विदाको दिन पारेर पार्कमा सरसफाई गरेको हो ।

पछिल्लो समय आन्तरिक तथा बाह्य पर्यटकको आउजाउ बढ्दै गएको पार्कमा जथाभावी फालिएका फोहोरजन्य वस्तुहरु टिपेर पार्क क्षेत्रको वातावरण सफा, स्वच्छ र हराभरा बनाइएको छोजँ धीका प्रशान्त गुरुङले जानकारी दिनुभयो ।

सामाजिक कार्यप्रति युवा विद्यार्थीलाई जागरुक गराउने र रचनात्मक काममा नयाँ पुस्तालाई अग्रसर गराउने उद्देश्यले सरसफाई कार्यक्रम आयोजना गरिएको पनि गुरुङले जानकारी दिनुभयो । यस्ता कार्यक्रमहरूलाई निरन्तर सञ्चालन गरिरहने विद्यार्थीहरुले बताएका छन् ।