धादिङ । धादिङको गल्छी र सिद्धलेक गाउँपालिकामा सञ्चालित खाद्य तथा पोषण सुरक्षा सुधार आयोजनाको स्थलगत अनुगमन गरिएको छ ।
खाद्य तथा पोषण सुरक्षा सुधार आयोजना (फानसेप), आयोजना क्लस्टर एकाइ गोरखा अन्तर्गत गल्छी र सिद्धलेक गाउँपालिकामा सञ्चालित कार्यक्रमहरूको मंगलबार विज्ञहरुसहितको टोलीले स्थलगत अनुगमन गरेको हो । अनुगमनका क्रममा दुवै गाउँपालिकामा फानसेप आयोजनाद्वारा गठित कृषक समूह र पोषण समूहमा यस वर्ष भएका गतिविधिबारे विज्ञ टोलीले किसानहरूसँग नै बसेर छलफल तथा अन्तरक्रिया गरेका छन् ।
आयोजना सञ्चालनपश्चात् गाउँघरको रूप नै फेरिएको र जीविकोपार्जनमा काम गरिरहेकोमा अहिले व्यावसायिक बन्न सहयोग पुगेको किसानहरूले बताएका छन् । कुखुरा, बाख्रा तथा गाईभैँसी पालनबाट अहिले सोचेभन्दा राम्रो आम्दानी भइरहेको गल्छी गाउँपालिका–१ सेतीदेवी कृषक समूहकी गीता मगरले बताउनुभयो ।
अनुगमनका क्रममा भेटिएका अधिकांश किसानहरूले आयोजनाले आफूहरूमा साँच्चिकै खुसी ल्याइदिएको बताएका छन् । खेतबारीमा व्यावसायिक ढङ्गबाट उत्पादन सुरु गरेको तरकारी संकलन केन्द्रमार्फत बिक्री गर्न पाएकोमा आफूहरूलाई सजिलो भएको सिद्धलेक–७ का राम गिरीले बताउनुभयो ।
‘हरेक बार खाना चार’ भन्ने भनाइमोजिम गाउँघरमा सञ्चालन गरिएको पोषण सुरक्षा कार्यक्रमले बालबालिकाको पोषण सुरक्षा र पठनसिप विकासमा सकारात्मक परिवर्तन देखिएको सिद्धलेक गाउँपालिका–६, समिटारकी इन्दिरा पुलामी मगरले बताउनुभयो ।
आयोजनाले ग्रामीण क्षेत्रको आवश्यकतालाई बुझेर आफ्ना गतिविधिहरू अगाडि बढाइरहेको फानसेप आयोजना क्लस्टर एकाइ गोरखाका प्रमुख होमनाथ लम्सालले बताउनुभयो । पोषण पाठशाला र घरबारी पोषण बगैँचा कार्यक्रम सञ्चालनले बालबालिका र महिलाहरूको स्वास्थ्यमा क्रमिक सुधार आएको कृषि अधिकृत संयम पण्डितले बताउनुभयो । व्यावसायिक बाख्रापालन, कुखुरापालन र दूध बिक्रीबाट ग्रामीण महिलाहरूले सिधै आम्दानी गर्न थालेको पनि कृषि अधिकृत बलदेवसिंह महरले जानकारी दिनुभयो । अनुगमनमा आयोजनाका कृषि अधिकृतहरू, पशुपालन विज्ञ, कृषि विज्ञ, पोषण विज्ञ र फिल्ड प्राविधिकहरू सहभागी थिए ।
अनुगमन टोली गाउँमा पुग्दा समूहमा आबद्ध महिलाहरूले फूलमाला पहिराएर स्वागत गरेका थिए । आयोजना गाउँमा छिरेपछि समुदायमा सकारात्मक परिवर्तनहरू देखा परेका छन् । हिजोका दिनमा परम्परागत खेतीपातीमै सीमित रहने महिलाहरू अहिले आधुनिक र व्यावसायिक कृषितर्फ अगाडि बढेका छन् ।
